Hadien wa mih ka Wyrta wa dawa ka JSU Laskein Block Circle (JSU-LBC) na u BDO ka Laskein Block wow su bait ya ka poisa cha kiwa khih mylla MGNREGA ha ka Account yong ki deiwa suba wa em iyi iyi cha lyndet neibhah wa ya ka nongsngi da su da kiwa pynlai ki VEC, ynne neiliang u BDO ka Block u Brightstar Langbang da pynche u hajrong ini.
U Brightstar da pynche u wa i pynkrehkaam ya ka National Electronic Fund Management System (NeFMS) wow su nongsngi hapoh ka MGNREGA, neiliang ka yung krehkaam yong oo da pyrchang ko wow wanrah ya waroh ki wakreh hapoh ka 100% DBT heiwa ka nongsngi da pynpoi bait ha ka Account kiwa yoh myntoi.
Tangwa hadien wa pynkrehkaam ya ka National Lockdown nadooh ka 24 Wisu uni u snem wow yakhun ya ka khlam u COVID-19 wei pynkrehkaam sa ya ki Curfew ha ka District, kamtæ i lithooh ya ka nongsngi na ki Bank da man i iwa eh ya ki VEC neibhah wa chitom i lai i wan (Transportation), wei i pynkrehkaam ya ki kyndon wow yada na ka khlam u COVID-19.
Katwa kamtæ i su ya ka nongsngi katkam wa da chah ka sorkar toh du lyngba ki VEC hadooh wa man i kaam kamwa jooh (chwa u COVID-19) wei da pynlait ya kiwon kiwon ki kyndon wa pynkrehkaam ka sorkar.
U Brighstar da ong u leh wa lada kiwa khih mylla namo kiwa yoh myntoi (Beneficiary) kwah ki wow poi bait ka poisa ha ki Account yong ki, ye ki wow pyntip wei ebor ya ki Chairman/Secretary/Female Member ka VEC wow sai ki ya ka nongsngi neibynta yong ki.
Chooh choh da pynche u wa hanlada ki VEC wa boon hapoh ka Laskein Block jngai ki na ki Bank, man i iwa eh ya ki paidbah wow sai ya ka poisa yong ki khnang wow yada wei wow lait nei poor u COVID 19, wei ka yung krehkaam yong u BDO da leh ko katkam ki kyndon wa da booh ka sorkar heiyatoh wa ini (su nongsngi) hapoh ka MGNREGA neidaw ka COVID-19.
Heijooh i por da nong u wa lada em kiwa yoh myntoi tangwa em ki iwon iwon i ood i khñium heiyatoh wa i rukom su ya ka nongsngi na ka VEC ye ki wow pyntip/ujor cha ka yung krehkaam u BDO heiyatoh wa ini khnang wow ye u leh ya iwa emkaam.
