Neiliang ka CID Meghalaya Police da pyntip ko wa da em boon ki bru wa chah thok lyngba ka OLX hanla boonsein da sneiñ ya ki bru wow man ki kiwa husiar neibhah wa em boon ki bru wa chim kabu kiwa chukor ha OLX kamjooh kiwi ki rynsan Online deiwa kam wa ki toh ki bru Army deiwa pynyoo ya ki kot ki sla kiwa chna thok.
Da em leh ki bru kiwa chim kabu deiwa dai ya ki kari kiwa ym em biang ki kot ki sla kiwa pynbiej bru wow su yaka bai phah tiar (Courier Charges) wa kiwi kiwi de chwa wow yoh ya ki tiar. Kamtæ da kyntu ya ki paidbah wow man ki kiwa husiar bha hawa dai wa thied Online.
Chooh chooh da ong leh wa em boon ki bru wa chah thok heiyatoh wow yoh kreh nadooh ki Skilled/Unskilled, ki Artist, ki Model lynga ki Social Media Account wa chna thok kamjooh ki Web Portal heiwa manda pyntip wa da yoh ya ki kreh lane wa chah jied, daw phah su ya ki yaka bai Application Form, ki bai phah ya ki kot ki sla wa kiwi kiwi.
Da em leh kiwa paan ki yutip wa boon jait i yong ki bru (Private Data) kiwa hadien da pynemkaam yow chim kabu ya ki bru, kamtæ da kyntu ya ki paidbah wow man kiwa syndong bha hawa yaleh kreh Online.
