Jowai: Ka satri ki seiñbhalang hapoh ka jylla kawa tip kam ka Confederation of Meghalaya Social Organisation (CoMSO) ynne ka sngi da e dorkhat ko cha u lat ka jylla wow pdiang ya i pynkylla ya ka Meghalaya Residents Safety and Security Act (MRSSA) 2016.
Kam wow pynkynmoo heini ka sorkar jylla da pdiang ko ko ya ka Meghalaya Residents Safety and Security (Amendment) Ordinance, 2019 wei katni dang sah wow yoh yei pdiang ka yung krehkaam u Lat.
Neiliang ka CoMSO ha ka dorkhat da ong ko wa kani ka Ordinance daw yarap ko wow poi ha ka thong kani ka aiñ wow yada ya kiwa chong chnong ka jylla wei kamjooh leh daw yada ko ya ki jaitbru khian paaid ka jylla kiwa man ki jaitbru ri-loom.
Da ong ko leh wa ini i leh ka sorkar jylla wow wanrah da ka Ordinance man i hadien wa da phyllu yumut wa ki bru chemphang ka aiñ, ki bru samen, ki seiñ saiñ hima, ki dorbar chnong wa kiwi kiwi.
Chooh chooh da ong ko wa i emkaam bait ya waroh ki wymtoh ki tre jylla kiwa thmu wow sah palat 24 kynta wow e yutip yeiwa emkaam ym ktah ko yei lai i wan ki kamwa da ong da ka yung krehkaam u montri rangbah ka jylla.
Kamtæ da kyntu ya u lat wow pdiang wei wow pynkrehkaam noh ya kani ka Ordinance hapoh jylla.
Discussion about this post