Neiliang ka East Jaintia Taxi Owner Driver Association hadien wa boon na kiwa chong chnong da chah ktah ki ha u COVID-19 heiwa da hap wow khang ya ki yaw ki haat wei ka rukom kamai kari leh da man ko i doohnong wa khroo ya kiwa yah kari. Kamtæ ka sein da kyntu ko ya kiwa yah kari wow lai phah e tika yada na u COVID-19 khnang wow ye u pynduna ya i poor yong u khñiang COVID-19.
Ka seiñ lyngba ka kyrwoh na u Hameki Salahe, Secretary da kyntu u leh ya kiwa yah kari waroh kiwa dep yoh tika wow thoh ki ya i ktien VACCINATED ha ka kot A4 wei wow biah ki ha ki kari yong ki. Ya kitu won ki wym pu em dep yoh tika COVID-19, emkaam wow thoh ki NOT VACCINATED wei wow biah ki ha ki kari yong ki.
Yow pynduna ya kani ka khlam, ka seiñ da kyrpaad ko leh ya waroh kiwa yah kari wow deiñ ki ya ki Mask heijooh i por wow pynemkaam leh da ki Sanitizer hapoh ki kari kamai yong ki.
Chooh chooh da kyntu leh ya kiwa yah kari wow thap bru katkam wa da phah itæ 3+1 donhi, iwa mut 3 ngut kiwa chong wa uwa yah kari.
