theme-sticky-logo-alt
theme-logo-alt
Advertisement ad1
Advertisement ad1

Khyrngiat kiwa kyrchaan u Shitlang Pale wa mih madan u wow pyrchah ya ki Coke Factory

Advertisement ad1
Advertisement ad1

Katkam ka kyrwoh wa phah da u Forgive Dkhar da ong wa da khyrngiat yong bru kiwa kyrchaan yong u Shitlang Pale kamwa yooh tdong pseiñ hajrong i yoo yei mih madan u syndet syndet pyrchah ya ki Coke Factory wa em hapoh ka Elaka Sutnga, wei i mih madan yong oo man ko kamwa mih ki tit khlem ka aiom neibhah wa ym jooh mih u wow klam mynnu mynnu leh wot ha ki Assembly Session wow klam chaphang ka roi ka paar wa i sahdien yong ka thaaiñ lane kiwon kiwon ki phang wa yatoh wa ka imlang sahlang.

Deiwa synran lang u wow mih madan ha ka 03-08-21 deilang wa ka ECC, ka seiñ kawa ym pu em em yei tipmit wa ka wym pu Register pyn yaka hi deiwa yalam lang da ki spah ngut ki bru ha kam ini i por yong ka khlam Coronavirus wa dang poor ko deiwa joor bha hapoh ka District yong i, wei khlem da yoh bor na u DC wow mih madan deilang wa utai u paaid wa boon bah.

Advertisement ad1

Ha itai i mih madan paidbah da yahkhmat da ki dkhot ka ECC deiwa kbai lang wa ki kyntien “Condemn sorkar, Condemn Meghalaya State Pollution Control Board, Condemn Conrad Sangma, Condemn Sniawbhalang Dhar.”

U Forgive Dkhar uwa man leh u khon ka Elaka Sutnga wei uwa kyrchaan borbah yong u Shitlang Pale, da ong u, “I dap i da i mynsien wa sñiawdiaw hadooh kattæ kattæ hawa i yoo i ya kam ini i mih madan ha kam ini i por wa ktah joor nei poor smat u khñiang khlam, hawa i yoo i wa kiwa yahkhmat yong katai ka lai paidbah toh ki bru kiwa da stad da nang tangwa da kwah pathan ki wow pynkheiñ ya ki kyndon aiñ khlem da bood ryntih yeiwa phah ka sorkar lyngba ka Health Ministry wei khlem da yoh bor na u DC wow pynman ya kam katai ka yalang deiwa em da ki spah ngut ki bru. Kam ki bru kiwa tip aiñ kammon da pynkheiñ ki ya ka aiñ. Nga dap O leh da i sñiawsih wa joor hawa pait O ya ka Constituency yong nga hawa kam u MLA uwa pynyieñ i u wym jooh yoo ya i khia i chon u paidbah ka Constituency ha waroh ki liang nadooh ki thaaiñ khappood, i roi i paar, i yap i im wa kamtæ ter ter yong u paidbah najrong wa ym jooh yoo wa klam u hapoh Assembly wot chisien leh, sa iwi leh i sñiawsih i wow ong wa kam u paaid yong ka Constituency ym jooh yoh laad i wow yachem wa oo neidaw wa boon kam u du ha ki Office ki yong oo kitæ kawi ha 1-Kilo, Soo-Kilo wa teiñ teiñ ha Lad-kyrluh wei boon hi da chem ya oo ha 1-Kilo wei ym tip iyi leh u heitæ, to bichaar da phi, daw chem phi lada lai thooh phi ya oo heitæ.”

“I kyrpaad joor i ya ka sorkar wa toh u burom ko wow leh iyi iyi ya kam kini ki bru ki wym salia de wow pynkheiñ ya ki aiñ SOP yong ka sorkar neibhah wa i kam ki paaid East Jaiñtia Hill katni da yoo i yei mih paidbah ha ka 03-08-21 hadooh da ki spah ngut wei ini da pyntieñ pynsmiej ko ya i wa uni u khñiang Coronavirus daw wan ban u ya ka District yong i neidaw bah yong kitai kiwa mih paidbah.”

“Nga yooluti O leh wa neini chakhmat u MLA yong i u Shitlang Pale u nang kreh chitom wow kreh leh ya kiwi won de ki phang neibynta i khia i chon u paidbah wot ha Assembly leh kamjooh ym du ha sarokbah.”

“I kitbok kitrwiang i leh ya oo wa neini chakhmat napyrdi ki 60 ngut ki MLA u man u uwa snar tam wow yasaaid hapoh Assembly neibynta ka yap ka im yong u paidbah wa ka Constituency hi waroh kawi.”

Share this:
Previous

Daw takit u Retired Judge ka Madhya Pradesh HC hajrong i kem khoo ka Assam

Next

Kyntu ka East Jaintia Taxi Owner Driver Association wow chim yei tika