Ka Federation of Khasi Jaiñtia & Garo People (FKJGP), Jaiñtia Hills haka khubor wa da phah lyngba u President ka seiñ u Tuesday Lytep, da kyntu joor u ya ki yung krehkaam yong ki BDO kiwa em ha ri-loom Jaiñtia wow booddien ki yei pynkreh yaka Scheme 100 sngi namo ka MGNREGA hadein wa da dep e ya ki Work Order cha ki VEC.
Ka seiñ da ong ko wa katkam i chem yong ka wa na i por cha i por da chem ya chiboon i duna hei rukom pynkreh ya kani ka Scheme neibhah boon ki VEC toh kiwa pynkreh tang dep donhi i wym yatoh wei mang poisa (Estimate), wei kamjooh da pynkreh leh da ki tiar ki mar ki wym hoi kiwa toh dor, neitæ i daw ym jooh neh slem i kreh wei du hadien 3-4 bnai da jæd da pra.
Heijooh i por ka seiñ da ong ko wa ym ye u len wa em hi leh ki VEC kiwa kreh bha kreh sakhiat kiwa pynemkaam hok yaka poisa kawa yoh na kani ka Scheme wei da man sakhiat i i yarap i kyrkhu yaka chnong ka thaw hawa pynemkaam hok ya kani ka Scheme.
Kamtæ ka seiñ da e yumut ko leh yaka yung krehkaam yong ki BDO wym toh u chim hi-eh ki ya ki Bill wa da wan e da ki Secretary khlem da pait bniah ya i rukom pynkreh ka VEC lada toh mo ym yatoh mo katkam i kreh wa i lut i sep wa e da ka sorkar kamjooh katkam ki kyndon aiñ ka MGRNEGA.
Kamjooh da kyntu lang ya ki bor yong ka District lyngba yong ka District Rural Development Agency (DRDA) wow chimkhia lang ki heiyatoh wa ini deiwa lai pait ya i rukom pynkreh.