Ka seiñ Hynñiewtrep Integrated Territorial Organization (HITO) ynne ka sngi da thoh ko cha u Montri Rangbah ka jylla, u Conrad Sangma wow pyntip heiyatoh wa i man i long ka Mukroh, Psiar, Khanduli, Umlaper wa kiwi ki chnong wa em ha khappood.
Da ong wa ki paidbah ka thaaiñ khappood da chem chitom ki nei leh embor ki pult ka Assam kawa emkti wow pyntieñ, lute wa kiwi ki kaam wa man pyrchah aiñ.
Da kdaw ko leh wa katkam ka yalang ki montri ka jylla ha u Naiynru da mih kawi ka hukum na ka Police Headquarters No. MG/XIX-225/2020/12 kawa em ya ka tarik 15-06-2021, wow chim yukheiñ heiyatoh wa ki kaam pyrchah aiñ ha ki san snem wa dadep khnang wow ye u chna ya ki Police Stations/Outposts ha kylleiñ ki thaw.
Ka seiñ da yaroh ko ya ka sorkar kawa kwah u yada ya ki paidbah ha khappood wei da kyntu ko ya ka sorkar wow pynku kyrdan wei wow booh noh ya ki Police Station/Outpost heiwa da kdaw ko wa wot hadien wa ku ki kaam pyrchah aiñ ha khappood ka East Jaiñtia Hills wa Ri-Bhoi na ki 19 tylli ki thaw, da tyrwa won wow chna yung krehkaam pulit du ha ki ar thaw ha Ri-Bhoi wa ha East Jaiñtia Hills.
Hajrong kini waroh ka seiñ da ong ko wa ki thaw booh ya ki pulit kiwa da tyrwa toh kiwa ran bha chapoh u pood katwa ka Assam won da chna da tei ko ya ki yung chapoh ka jylla khlem kheiñ ya ki paidbah ya kiwa chong wa sah ha kini ki thaw.
Kamtæ da kyntu ko ya ka sorkar wow chimkhia noh ya ini waroh deiwa pyrkhat yei yap i im ki bru.
