Shillong: Ka Hills State People’s Democratic Party ( HSPDP) da sñiawkhia ko hajrong i man i long i chongsuk chongsaiñ ha sor Shillong nei ya kyn’ad wada neh kattu la le sngi kattu wow dawa u kyrriah noh ya kiwa sah ha ka Themmator namo ka Harijan Colony.
Hawa yaklam ynne ka sngi, u Witting Mawsor da ong i wa ka Party da beiñ joor ko ya iwa jia chah dat ki le ngut ki khynnah Khasi ha ka 31 Naisan deiwa dawa leh wow kem ya kiwa emkti ha ini i kaam.
Heijooh i por da kyntu ya ka sorkar wow kyrriah noh ya kiwa sah ha kani ka thaw cha ki thaw wada pynkhreh da ka sorkar neibhah i em yong kini ki bru da wanrah i yei eh neipor cheipor ha Shillong.
Da ong u leh wa i em kini ki bru ha kani ka thaw da ktah i yei khooid i jngiar da pynkhynñia wei da wanrah i yei thut ha i chongsuk ha kani ka thaiñ.
Katwa u MLA ka Mawkyrwat u Renikton Lyngdoh da ong u wa i wym leh ki bor sorkar wa da lai wow kyrriah ya kini ki bru na kani ka thaw da wanrah ko chiboon i eh i khoo, wei hadien wa da mih i yakhih boonsien ki yakhih du na ini i daw, kani ka sorkar wa katni toh u chimkhia ko yeini iwa man iwa emkaam dooh.
U Lyngdoh da ong u leh wa kani ka yakhih ki paidbah man ko ka yakhih ka jaitbru neibhah wa kani man ko i dawa wa da slem, tangwa da kyntu u leh ya ki paidbah wa yakhih wow kiar ki nei awri awra wow elaad ya ka sorkar wow leh yeiwa emkaam.
Ha iwi i liang ka HSPDP da kyntu ko ya ka sorkar wow pynyinsur noh ya ka Curfew ha ki thaiñ Motphran neibhah kani da ktah ko chiboon ya ka pliang-ja kiwa boon ki paidbah kiwa im sngi na Iewduh, khamtam kiwa rep kiwa pynlai yaaw ya ki mar rep yong yong ki.
Discussion about this post