Jowai: Ka seiñ HYC-West Jaiñtia Hills Circle ynne ka sngi da lai yachem ko wa u Montri ka Tnat Bordiñ ka jylla u Sniawbhalang Dhar, heiwa da e ko leh ya kawi ka dorkhat ha oo heiwa da booh ya ki phang dawa wow yada ya i hok ki tre ri.
Neiliang u President ka seiñ u Damanleki Lathong da ong u wa da emkaam bran bran wow pynkrehkaam ya ki phang wa da dawa ka seiñ neibhah kamwa man katni ympu em ka aiñ wow sonteri yei rukom psiah tooh ki baar jylla cha kani ka jylla neibhah ini i wan psiah tooh ki baar jylla booh ko i ma ya ki tre ri tre jylla kiwa man ki khian paaid.
Wow sonteri yei wan ki baar jylla kiwi ki jylla wa em ki khianpaaid da booh ki ya ki aiñ wow yada na kam ini i psiah tooh.
“Ha Mizoram, Nagaland wa Arunachal Pradesh da pynkrehkaam ya ka Inner Line Permit (ILP) kawa da pynkha na ka Eastern Bengal Frontier Regulation Act, 1873, ka Sikkim em ko ka aiñ ka jylla wa sariem wa ka ILP” da ong ka seiñ wei da pynrap ko deiwa ong wa heini leh emkaam ya kam kini ki aiñ.
Wow yada ya ka ri, ka seiñ ong ko wa ka jylla Meghalaya em ko u pood wa ka ri Bangladesh wei dang boon i kær naar-chieh dang sah i, kamtæ emkaam wow kær noh ya u pood wa ka yow lait u psiah tooh ki baar ri.
Da pynkynmoo leh ya u pood u ang ka jylla wa ka Assam uwa kattu la 40 snem ympu ye u pynbait heiwa da dooh leh chiboon ki mynsien na ini i daw. Kamtæ ka jylla Meghalaya emkaam wow yieñ ko hajrong u pood Hima, pood Raij wa u pood chnong yow pynbait noh ya ini.
Neiliang u Sniawbhalang Dhar da kular u wow chimkhia yeiwa da dawa ka seiñ wei ka seiñ da kyntu ko ya ka sorkar u Mukul Sangma wow chimkhia ya kini waroh neibynta i bha i miat wa i suk ki paidbah ka jylla.
Ka seiñ da ong ko wa daw lai yachem ko ya kiwi ki montri ka sorkar jylla wow pynmankaam ya iwa dawa ka seiñ.
Kani toh katkam ka khubor na u Albiius Phawa , General Secretary ka HYC West Jaiñtia Hills District Unit.
Discussion about this post