Ka seiñ Meghalaya People United Front-Mukhaialong San Shnong Circle (MPUF-MS Circle) hapoh i yahkhmat u President wa u General Secretary yong ka, u Juni Phawa wa u Ialamki Sana, hadien wa ood ki paidbah ka thaaiñ wa em uwi u Transformer wa sih la kamwa chi bnai ha kawi ka dong wa tip kam ka Wah Shnong kawa haap hapoh ka chnong Mukhaialong, East Jaiñtia Hills ynne ka sngi da lai yachem ko ya ki sahep ka MePDCL.
Ha ini i lai yachem ya u H. Iakai ha yung krehkaam ka Khliehriat Distribution Division MePDCL Mowakhu uwa pait ya ka thaaiñ Sutnga wa ka thaaiñ San Chnong, neiliang uni u sahep da ong u wa da phah u ya ka bui (Report) cha ki bor wa hajrong kam cha u Executive Engineer ka MePDCL Mowakhu wei sah sa ha ki bor wa hajrong donhi wow kylliang ya uni u Transformer wa da sih.
Heijooh i por ka seiñ da mut ko wow lai yachem ya u Executive Engineer tangwa ym em u ha yung krehkaam u.
Neiliang ka seiñ da kyntu ko ya ka chnat MePDCL wow leh yeiwa emkaam hajrong ini neibhah wa i sih u Transformer da ktah joor i ya ki paidbah ha kiwa boon ki liang khamtam ya ki khynnah skur kiwa leh ya ki Online Class yong ki ha kini ki por lyngba ki phone yong ki.
