Ka BJP Meghalaya Pradesh da ujor ko cha ka United Nations Human Rights Council (UNHRC) hadien wa pynkylla ya ka Hagia Sophia Church cha ka Mosque ha ri Turkey.
Da ong ko wa em chiboon kam kini ki kaam wa man pyrchah ya i ngait niam wei ini man i iwa ym ye u pdiang wei man i leh pyrchah ya i hok manbru namo Human Rights deiwa kyntu waka UNHRC toh u chimkhia ko ya kam kini ki kaam.
Kani ka yung mane Hagia Sophia toh kawa da chna ha u 360 A.D. da u syiem Byzantin, Constantius wei man ko kawi na ki yungmane wa heh dooh ha ki hajar snem wa da lai.
U President ka BJP Meghalaya Pradesh, u Ernest Mawrie da ong u wa ini i jia da ktah i ya i sñiaw ki bru wa ngait ya ka niam Christan deiwa kyntu ya ka wow chimkhia yeini.
Ya kani ka ujor, da e cha u Changrok Soh uwa man kam u Chair-Rapporteur ka Working Committee of Communications, UNHRC.
