Ka seiñ Meghalaya People’s United Front (MPUF) ynne da pynman ko ya ka CEC heiwa da rai wow pyrchah yei thmu ka sorkar wow su ya ka tulop kiwa kreh ki le tylli ki Autonomous District Council (ADC).
Ka MPUF da ong ko wa i pynbor ka sorkar ya ki le tylli ki ADC wa kynthup ya ka JHADC, KHADC wa GHADC toh i wym ye u pdiang.
U President ka seiñ, u Dapoiwanmi Laloo da kylli u wa lada em ini i thmu ka sorkar, kamtæ da em mo ka bhah wa da mang ha ka Dorbar Mang Tangka ka sorkar wow leh yeini neibynta ki le District Council.
Da kylli u leh wa weileh ym pynkhlan chooh ka sorkar ya ki District Council katkam ka Sixth Schedule ka riti synchaar ka ri khnang wow ye ki u pait ya ki bru yong ki wei wow su ya ka tulop pyn da ki hi.
Chooh chooh da kylli u wa ha ki snem wa dadep ka sorkar da thmu ko wow pynman ya ka Election Municipal khamtam ha Jaiñtia Hills iwa ye leh u man i daw wa kwah ko u su ya ka tulop.
U Dapoiwanmi da ong u leh wa ki District Council toh ki stieh wow yada yei khyndaw u chyiap kamtæ i thmu ka sorkar wow su ya ka tulop daw pyntlot chooh chooh i ya ki District Council.
Heijooh i por da ong u wa kiwon kiwon ki Project ka sorkar pyrdi næ sorkar jylla emkaam ki u yoh ya ka NOC na ki District Council boi ini i bor leh daw dooh ki District Council.
Kamtæ ka seiñ da kyntu ko ya ki District Council wow pyrchah yeini i thmu ka sorkar lym kamtæ wer pa wer i bor ki District Council daw wiar i wei daw em da ki Panchayati Raj heithaw ki Waheh Chnong.
U Dapoiwanmi da ong u wa katkam ka Article 243 wa 244 ka Constitution batai che ki heiyatoh wa i rukom krehkaam ki District Council i wym e laad ya ki Municipal wow krehkaam ha kini ki thaw.
Discussion about this post