Shillong: Hadien wa pynman yakhih ki wakreh ka GVK EMRI 108 Emergency Service wa i thut i krehlaam ka Emergency Services ka EMRI, u AL Hek, uwa man u montri i chait i khiah da khut yalang u ya ki chnat waphær waphær.
Neiliang u Hek da phah u ya kani ka chnat wow khut yalang ko ha ka 22 tarik uni u bnai wa kiwa pynlai ya ka EMRI wa ki wakreh yong ka.
Da phah ya ki wakreh ka EMRI kiwa yakhih wow sdang kreh biang ki neibhah ma EMRI 108 toh ka bynta wa emkaam wow yada yei mynsien bru khamtam kiwa emkaam yarap jhan wei neiliang ka sorkar leh yaleh ko wow thooh ya ki laad wow pyndep yeiwa emkaam.
Kiwa kreh ka EMRI da sdang ki yei yakhih nadooh 12:00 waje ynne i synyaw wei da pynman ki ya i yakhih deiwa uiñ ha kylleiñ ka sor Shillong nadooh na yung krehkaam ka EMRI wa em ha Lawmali wa kiwi ki thaw ka sor wei da pynkut ya ini i uiñ ha Madan Malki heiwa da rai wow sahmiet ki ha i thaw rieh-slap kani ka Madan neibhah em ki wakreh kiwa wan na ki District kam na ri-loom Garo, Ri-Bhoi wa Jaiñtia.
U Roipar Raswai uwa man kam u President ka Meghalaya EMRI Workers Union da ong u wa ynne i janmiet da yoh ki u yachem wa ka DC ka East Khasi Hills ka Matsiewdor War chirup wa kiwa pynlai ka EMRI ha yung krehkaam ka DC.
Da ong u wa ha kani ka yalang ka DC da kyrpaad ko ya kiwa yakhih wow kyrriah ki na Madan Malki wow lai cha JN Complex, Polo wei da phah ko leh ya kiwa pynlai ka EMRI wow jubab ki ya i eh i khoo wa yachem ki wakreh.
Chooh chooh u Roipar da kyrpaad u leh ya ki paidbah wow man ki kiwa yaichah wa ka seiñ kam ha kini ki por wa yakhih ka seiñ.
Discussion about this post