15 49.0138 8.38624 1 1 4000 1 https://wyrta.com 300 0

Wai u Prestone Tynsong ya ka yingkieñ wa pynyabi yaka EJH waka WJH wa 26 klur ha Borghat

0 Comments

Jowai: U symbood montri rangbah ka sorkar jylla u Prestone Tynsong, ynne ka sngi da wai paidbah u ya ka yingkieñ wa jrong hadooh 180 Meter kawa kap chiliang yaka wah Myntdu wow pynyabi yaki ar tylli ki District, ka East wa ka West Jaiñtia Hills kawa em ha chnong Borghat ha u sarok wa tip kam Dawki-Muktapur-Borghat Road.

Ha kani ka sngi da synran lang da u montri ka chnat puræ puthi u Lahkmen Rymbui uwa man leh u MLA ka thaaiñ naka Amlarem Constituency West Jaiñtia, u Shitlang Pale MLA ka thaaiñ naka Sutnga Saipung Constituency East Jaiñtia, u Kyrmen Shylla montri ka chnat Social Welfare, ki sahep ka ka PWD wa kiwi kiwi.

Ya kani ka yingkieñ da chna hei lut wa poi hadooh T. 26 klur kawa sdang nadooh u snem 2010 ya kawa da kyrchaan poisa da ka NABARD lyngba ka Rural Infrastructure Development Fund.

Kani ka yingkeiñ toh kawa heh wow lai ar tylli ki kari mat chilliang wei da booh leh ya ki luti lai kjat ar tylli na rood.

Kani ka yingkeiñ daw yarap ko ya kiwa boon ki chnong wa em khappood kam ka Lumpyngngad, Kharkhana wa hap hapoh ka Amlarem Sub-Division West Jaiñtia Hills wa ya ka chnong Borghat, Kwator, Lejri, Huroi, Hingaria wa kiwi wa haap ha East Jaiñtia Hills.

Kamjooh u yarap ko ya ki warep wa kiwa khayi wa ya ki chipai ka BSF.

U Prestone Tynsong hawa e yei klam da ong u wa neiliang ka sorkar da dro ko yaka Map yong kitu ki thaw wa emkaam wow yoh ya ka roi ka paar khamtam haki thaw khappood, wei ka thong wa hakhmat dooh toh wow chna ya ki sarok. Da pyntip u wa ka sorkar ka da yoh mang poisa ko neibynta u snem 2018-19 kawa ym duna yaka T. 2000 klur wei u pynemkaam noh ya kani ka poisa chisein wa da kut u slap. 

Heiyatoh won wa i miat ka rymaw cha kani ka thaaiñ da kyrmen u wa ym slem de daw chna pynheh ya u sarok wa ki bru u yoh myntoi ki lyngba i wan kiwa uiñke suwari, wei katkam ka yukheiñ ym duna yaka 4 lak ki bru wa na baar kiw wan pait ya ka jylla yong i.

Tangwa da chem won wa em boon ki eh wa maad hawa chna sarok kam wym yoh thaw neidaw wa boon ki thaw toh ki yong ki bru samen næ ki thaw kur, wei katni da syad da i bai thaw bar ya ka bai chna sarok.  

Kamtæ da kyntu u ya kiwa synchaar chnong wow ya krehlang ki neibynta ka bha ka imlang sahlang.   

Kiwi de kiwa e yei klam kynthup ki ya u Lahkmen Rymbui, u Kyrmen Shylla, u Shitlang Pale, u P.R. Marwei Secretary PWD (R&B), u D.C. Chaudhry HMR Contractor, u Y.K. Roa General Manager ka NABARD wa kiwi.

Also Read: Sñiawkhia ka SBYWA wa jnah i kreh ya ka yingkieñ Tisang

Advertisement ad1

0 Comments

Leave a Reply