Ka Synjuk Waheh Shnong Ri Jaiñtia (SWSRJ), hawa yaklam wa kiwa pathai khubor lyngba u President yong ka, u Arminius Lypon da kyntu ko ya ki paidbah wa chong chnong, ki seiñbhalang kamjooh kiwa mihkhmat hapoh ka sorkar MDA wa yahkhmat ka NPP wow sñiawbha kyruiñ noh cha ki thaaiñ khappood khamtam ka Saipung Block neibhah ki sarok da man ki kiwa sih bha iwa da pynthut ya i lai i wan ki paidbah kamjooh leh wow pait ya ki thaw sumaar hapoh kani ka Block.
Da e khublei ki leh ya u MLA ka Khliehriat wa da ye wow wai ya ka Civil Hospital ha Khliehriat kawa 100 pyllong deiwa kyntu leh ya ka sorkar wow pynbiang ya ki kor wow e sumaar ha kani ka thaw.
Heijooh i por da kyntu ya ka sorkar jylla wow pait ya ki thaw kiwa da emkaam sakhiat wow yoh ya ka Block, ka Civil Sub-Division kam ha Laskeiñ, ka Thadlaskein C&RD Block kiwa da emkaam wow phiah noh ya ka deiwa pynmih da kawi ka Block ha Namdong.
Chooh chooh da kyntu ya ki 7 ngut ki MLA wow pyntikna wa ki kreh ha ki sarok khappood u man kiwa lai bait, ymdu u kut du hei wai wei booh mooyurim donhi.
Ka synjuk leh da pynsñiaw ko wa khnang wow wanrah ya i chongsuk da emkaam bha wow pynku kyrdan noh ya ki yung krehkaam ki pulit kiwa em hapoh Ri-loom Jaiñtia.
