theme-sticky-logo-alt
theme-logo-alt
Advertisement ad1

Kyntu ka Synjuk ki Waheh Chnong Ri-loom Jaiñtia wym toh u em i sñiaw yaphær wow ya tylli

Advertisement ad1
Advertisement ad1

Ynne ka sngi ka Synjuk ki Waheh Chnong Ri-loom Jaiñtia da pynman ko ya ka yalang wa jhan, heiwa u A. Lipon, President da ong u wa hadien wa da yoo yei eh i khoo ka Ri-loom Jaiñtia kyrpang ya ka District Headquarter ka West Jaiñtia Hills District, ka Jowai, neiliang ka Synjuk da khut ko ya ka yalang wa jhan wow kyntu yei emkaam wow wanrah ya i chongsuk chongsaaiñ, i khooid i jngiar wa i roi i paar neibhah wa ka District da chah ieh khonswet ko ha ka District Administration kawa pait wa yoo ya kiwa chong chnong ka Jowai heiwa ka Jowai Municipal Board ym ye de ko u wan kit yaki jhep chirup wa ka JHADC.

Da ong u wa da emkaam wow thoohlaad kammon wow pynsuk ya i emkaam ki paidbah ka Jowai kawa man kawi na ki thaw wa kyrpang yong ki nong Jaiñtia, “Yoo wa da man i sarom ya waroh kamtæ da kyntu yei yakrehlang wa ka Synjuk wei ymhoi u em iwon iwon i sñiaw yaphær han hapyrdi wa em ha jar jiar ki kynhun næ ki seiñ neibhah wa yoo i lada man i ki bru wym yachem yumut ki wym yatoh, yoo i wympoi ko cheiwon cheiwon leh.” 

Advertisement ad1

Da khut u leh ya waroh wow yakrehlang waroh kiwa chong chnong wa em ha Ri-loom Jaiñtia yow man kawi yow ye u pyndooh pyndam ya ini i eh i khoo.

Chooh chooh da ong u wa i jhep tip i wa man iwa sma, wei ktah i yei chait i khiah, nalor wa yoo sih yoo taroi, wei wa pynsih dur i ya ka Jowai kamjooh ya ka manbru longbru yong i.

“Kayi kawa jia yoo i wa ki dong ki chnong wa em cha katai ka thaaiñ Mynkjai em i dawa yong ki ya i hok ka yong ki wymhoi u linoh khiar ya ki jhep heitai, katkam watip i leh man ka wym yoobit yoobiang i rukom leh yow noh ya ki jhep, neiliang ki bor District da yoo wa da pynmih ko yaki khubor ne da khut ko yaka yalang tangwa ym em u khut ya ka Synjuk kawa kreh neibynta ka Ri-loom Jaiñtia,” da ong u Lipon. 

Yoo won i wa hapyrdi itæ em won sa ki Synjuk Waheh Chnong Jowai da ya pisa lynga ki wow dawa yei hok yong ki wow pynkhooid ya i jhep iwa neh sah hapoh Jowai, wei da em leh ka yakhih ka yapynbaad wa boonjait, kamtæ yow yoh ka laad toh u em i yakrehlang.

Neiliang u S.S. Langi u Advisor ka Synjuk da ong u wa kawi kawa da yaklam ynne haka yalang toh u kyrpaad ya ka District Administration, ya kiwa mihkhmat wow pynsmat ko u thooh ya ki thaw khnang yow ye u pynkhooid ya i jhep wa em ha Jowai iwa da ktah ya ki bru ka Ri-loom Jaiñtia nadooh ki palatsor wa ki sor, neibhah i em ini i jhep daw chna kjut i palat bar ya u COVID-19. 

Da rai leh wow kyrpaad ya kitu ki chnong wa chah ktah ha katu ka thaw (ha Mynkjai) leh u man kiwa yaichah chibet chipor wei ka sorkar leh wymhoi u kheiñ stiñ ko, wa toh u em noh dei por (Deadline) yow pynkhooid ya i jhep.

Heiyatoh waka imlang sahlang da kyntu wa ymhoi u wanrah iwon iwon i sñiaw yaphær nadooh ki seinbhalang, ki chnong ki thaw, ki synjuk wa lyngba kini ki jhep u mih i chah ktah kamwa da yoo haki khubor.

Share this:
Previous

Maham ka Sabahmuswang ya kiwa noh jhep roi ha talawiar ki sarok ka chnong

Next

Daw pynman ya ka Cyclothon waka Independence Day Run 2021