Ka Synjuk Waheh Chnong Ri Jaintia da kyntu ko ya ki waheh chnong ki dorbar chnong wow man ki kiwa pynrkhiñ bha yei psiah i mih ki bru kiwa wan na baar ka jylla wa na kiwi ki thaw, kiwa khlem da yoh bor na ki waheh chnong namo ki wym ye u pynsakhiat yei chait i khiah yong ki.
Kamjooh leh u khang ki ya ki bru yong ki chnong u yakhleh lang wa kiwi tawan ki jaitbru kiwa na lait na baar, u khang ki leh yei lai ki bru yong ka chnong wow lai cha baar jylla næ cha ki thaw wa da em ka kjut khlam. Kani u man ko kam wow yada u kiar na i yabi næ ya poor kani ka kjut wa chyrkhei kawa da sdang wow ktah ya ki jylla wa marjan kam ka Assam wa kiwi tawan ka kani ka kjut næ ka khlam wa da tip lang ka pyrthai kam ka Coronavirus lane COVID-19.
Kamtæ ka Synjuk ban joor wei kyntu joor ko wym hoi u kheiñstiñ nadooh ha sor, khapsor chadooh nongkyndong khamtam kitu ki chnong wa ya chongkhleh wa kiwi ki jaitbru kam ki dkhar wa kiwi kiwi ki bru wa na jngai wow sñiawbha pait sylli bha yei psiah i mih yong ki, wei wow pyntip leh cha ki bor ka aiñ sorkar kamjooh cha ki chnat ka chait ka khiah, kamtam cha u Deputy Commissioner ka District lada jia iwon iwon iwa em hei eh kam heini i por jynjar.
Ka synjuk kam wow pynsuk ya ki waheh shnong da em leh ki Identity Card neibynta yong ki wa da chna neibynta pyn-ar District East wa West Jaiñtia Hills yow pynemkaam hawa lai wa wan kam wow suk u yarap pyntipmit ya ki hawa lai emkaam næ lai yarap ya ki bru yong ka chnong, ka synjuk kyntu ko leh ya ki waheh chnong wym hoi u chim ki ya ka aiñ ha ki kti yong ki næ pynchitom ya ki bru wa lai palat aiñ wow pyntip cha ki bor pulit lada em kiwa leh pyrchah ya ki kyndon aiñ ha ki chnong ki thaw.
Da kyntu leh ya ki waheh chnong khamtam ha kitu ki chnong wa pynman ya ka yaw ka haat da ki seiñ chnong wow sñiawbha ki u pynrkhiñ bha yei rukom thied rukom pet yei wan yaw wan haat deiwa bood ryntih ya ka aiñ ka “Social Distancing” kamjooh leh ya kitu ki chnong wa elaad u dai u thied hapoh chnong.
Kam chibynta yow biang yow dap ka baam ka dih yong kiwa chong chnong hawaroh pyn artylli ki District ka ri Jaiñtia, ka synjuk kyrpaad jur ko ya ka sorkar, kiwa mihkhmat nadooh ki MLA, MP wa kiwi wow yarap pynap pynsñiaw cha ki bor yong ka sorkar bei næ sorkar jylla yow pynsmat u e yarap ha ki Bank Account kiwa toh u yoh myntoi lyngba ka Labour Department kamjooh lyngba ka MGNREGS næ ka khih 100 sngi wa kiwi tawan ki laad yarap, yaki Muster Roll, kiwa khih mylla wa kiwi khnang yow ya imlang yow ya biang ya dap ki lymboit lymbiang kam ha kini ki por jynjar. Pynkut ka kyrwoh na u A. Lipon, President ka Synjuk Waheh Chnong Ri Jaiñtia.
Discussion about this post