Ki le ngut ki MDC yong ka JHADC kiwa kynthup ya u Lakhon Biam, u Kriso Langstang wa u Dawan Lyngdoh da kyntu ki ya u CEM yong ka JHADC u Thombor Shiwat wow khut chwa da ka yalang ya waroh ki MDC yong ka JHADC ha chwa wow khut yaka Coordination Committee wa ki MLA na ri-loom Jaiñtia, deiwa ong wa ym toh wa pyrchah ya ini tangwa kyntu ki wow sdang chwa wa kiwa na yung ym toh wow khut chwa ya kiwa na baar kam wa da leh ya u Tonu Dey (Guarav) neibhah wa nadooh wa da chah jied ki kam kiwa mihkhmat MDC cha ka District Council la chi snem le bnai kattu, u CEM ym jooh em khut lang u yaki MDC wow yaklam ki waka Council wot chisien leh kawa da pynlyngoh yaki kam ki para MDC.
Da ong ki leh wa wa hei yoo cha ki khubor, u CEM da pynbna u wow khot lut yaki MLA na ri-loom Jaiñtia wow ya e yumut lang yaka Council deiwa chna daka Coordination Committee hapyrdi ki MLA waka EC yong oo, wei ini da kdaw che wa uni u CEM ym emkaam u ya kiwi ki MDC ki wym em hapoh ka Executive Committee yong oo wei ym jooh pdiang hi u leh ya i e yumut wa e ki wei da khut noh syndon da ki MLA, kamtæ hajrong ini neiliang ki le MDC da kyntu ki ya u CEM wow khut yaki MDC waroh wow ya e yumut lang kammon wow pynim yaka Council wei lada ym ye wow e yumut hadien ini, toh u khut won katwa yoo biang deiwa kyntu ya u CEM wa toh u khut chwa yaki MDC waroh.
Ki le MDC da ong ki wa ha kini ki chisnem le bnai kiwa da dep kam ki MDC kiwa em i kitkhlieh neibynta ka jaitbru waka Council hi waroh kawi, da thooh bniah wei da chem wa em chiboon ki daw kiwa yah yaka Council chei tkoh haka rukom krehkaam.
Wei hei chem yong ki, ka ri-loom Jaiñtia hi waroh kawi toh kawa mahajon nadong chadong nadooh ki marpohkhyndaw, ki thaw uiñke suwari, ki karkhana wei kamtæ ter ter, wei lada ka Council biang ko yaki Policy krehkaam, dang em i kyrmen wow pynkhai im wei wow pynim biang ya kani ka Council.