U Bishop Purely Lyngdoh uwa man u President ka Shillong All Faith Forum (SAFF) da ong u ynne ka sngi wa ki paidbah ymtoh u chongchit khlieh ki hawa yoh sñiaw ya ki khubor heini heitai neibhah wa boon ki khubor ymtoh kiwa sakhiat.
Da ong u wa ha kini ki sngi ka la-ær wa da kylla da mih ko wei i wym sñiawsuk ha kani ka ri India kawa em boon ki jait ki jaitbru wa ki jait niam waphær waphær. Ka thaaiñ North East toh kawa im dei suk dei saaiñ hapyrdi ki jaitbru waphær waphær tangwa katni ym ye wow ong wa da jan ka Election wei da wan kawi ka la-ær neibynta ka ri, neibhah wa da mih ki kynhun kiwa da klam bha yei dawa yong ki lyngba ka niam wei kani man ko kawa sñiawsih ka wym jooh em ha ka jylla wa ha ka ri.
Heijooh i por da pynsñiaw u yei sñiawkhia yei mih boon ki seiñ kiwa da klam kylleiñ kylleiñ yei dawa yong ki lyngba ka niam, wei ini da wanrah yei sñiawsih wa i wym sñiawsuk neibhah wa ka jylla Meghalaya waka thaaiñ North East ka India toh kawa chongsuk chongsaaiñ hapyrdi ki jaitbru wa ki jait niam waphær waphær ha ki por wa da lai.
Ynne ka sngi, ka SAFF da pynman ko yaka yalang yow yaklam yei jia wa ktah yei sñiaw yong ki jait niam waphær waphær hadien wa mih i jia khamtam dang ini wadep ha jylla Assam heiwa kawi ka Sister da chah lehbeiñ ko ha ki bru deiwa chah pynhiar na Bus wei da chah klam beiñ ko leh.
Da kyntu u ya ki paidbah wa chong chnong na ki jait niam wa jaitbru waphær waphær wow ya imlang imsuk deiwa ya sñiawthooh uwi ya uwi ymtoh wow wanrah yei pynjngut yei chongsuk chongsaaiñ.
Discussion about this post