Ki 321 ngut kiwa dang yoh COVID-19 ha Meghalaya ynne ka 2 tarik toh iwa boon dooh kiwa yoh ha ka chi sngi ha uni u snem wei da em leh 5 ngut kiwa yap iwa da pynpoi leh ya waroh kiwa da yap cha ka 179 ngut wei waroh kiwa da dep yoh ya uni u khñiang nadooh wa sdang da em ki 17,429 ngut hapoh ka jylla.
Na kiwa dang yoh ynne ka sngi, 97 ngut toh kiwa liwan chapoh ka jylla wa kiwa wan chapoh ka jylla. Kamtæ neiliang u Chief Secretary ka jylla Meghalaya u MS Rao da ong u wa ini i boon kiwa dang yoh toh iwa da ku bha hawa nujor wa ka tayaw wa da dep.
Da khana u leh wa da ku bha kiwa da hap thiah Hospital kamtæ da kyrpaad ya kiwa chong chnong wow dam ki wow lai u wan lada ym toh iwa emkaam wei wow neh hapoh yung yow pynduna yei poor ka khlam yow lait u khia i yukit ki thaw sumaar iwa emkaam bha wow kynmoo neibhah daw ktah ko yei chakri wa ki thaw sumaar ye ki wow e.
Da pynchlur u leh ya kitu kiwa da em 45 snem chaneiñ wow wan ki chakhmat wow chim yei dawai yada na u COVID-19 deiwa lai cha ki thaw e tika kiwa em chajan ki
Da ong u leh wa du dei myllien yei rukom im iwa yada nei poor ka khlam u ye i wow yoh yei jop deiwa pynrap wa ym toh wow e laad wow jia hapoh ka jylla kamwa da yoo wa jia cha kiwi ki jylla.