I dooh thaw lai puræ ki khynnah khamtam ha ka Class XI hapoh Ri-loom Jaiñtia dang joor i kat hadooh kini ki sngi iwa pynman ya ki skur wa ki College u pdiang ya ki khynnah palat ya i bor yong ki.
Ynne ka sngi neiliang u Wyrta da thooh yutip u heiwa da chem wa ha Industrial Training Institute, Khliehtyrchi dang em ki thaw kiwa ympu em u dap ki hanlada ka sngi wa khaddooh wow pdiang ya ki Application da kut ko ynne ka sngi.
Katkam wa man katni ha kani ka thaw puræ, ka e sikai Stenography em 24 Seat katwa kiwa da pyndap da em ki 40 ngut, ya ka Horticulture em 24 Seat katwa kiwa pyndap won em ki 26 ngut, ha ka Fruits and Vegetables Processing em 24 Seat katwa kiwa pyndap won dang du 8 ngut, Welder won em 24 Seat katwa kiwa pyndap won em ki 12 ngut wei kini ki puræ toh neibynta kiwa da dep ya ka SSLC katwa ka Mason (Building Construction) kawa em 24 Seat dang em du 7 ngut kiwa pyndap wei emkaam u pyndep du ya ka Class VIII.
Ka puræ Electrician (24 Seat) wa Mechanic (Motor Vehicle) kawa em 24 seat ym em u pdiang ha uni u snem neibhah wa kani ka puræ toh kawa ar snem wei da pdiang ya ki khynnah ha u snem wa dadep (2021).
Heiyatoh wa ini hawa yaklam wa u Deputy Commissioner ka West Jaiñtia Hills, u Garod LSN Dykes da kyntu u ya ki khynnah wow lai puræ ha kani ka thaw neibhah wa manda pyndep yei puræ neini daw yoh chiboon ki myntoi khamtam heiyatoh wa i yoh khih yoh kreh.
Chooh chooh da ban joor u wa ki myntoi wa ye ki khynnah u yoh na kani ka thaw, toh wa ya ka Certificate hapoh ka Craftsman Training Scheme wa da e da ka sorkar India ya kawa da tipmit da ka sorkar pyrdi wa ka sorkar jylla; ye ki khynnah wow sdang u seiñ kreh dei yong ki dahi heiwa rap wai ko boon ki laad wow yoh kreh. Ki khynnah ym emkaam ki wow su hawa lai puræ ha ka ITI wei ka sorkar leh e ko ya ka Stipend kawa man-u-bnai cha ki khynnah.
