Neiliang ka yung krehkaam u DC ka West Jaiñtia Hills District da pynmih u yei kyrpaad cha ki paidbah wa thap Vote ka District wa kamwa da tiplang i waroh wa ka Election wow jied ya kiwa mihkhmat yong i cha ka Parliament namo ka yung dorbar chna aiñ ka sorkar pyrdi kawa da tip leh kam ka Election MP cha ka Lok Sabha yong uni u snem 2024, dadep pynbna da ka Election Commission of India wa daw man ko hani ka 19 tarik Naitung (April) 2024, nadooh 7:00 waje i step hadooh 4:00 waje i janmiet ha waroh ki 312 tylli ki Polling Station wa em ha ki 5 tylli ki Assembly Segments yong ka West Jaiñtia Hills District, kitæ ka 1-Nartiang (ST), 2-Jowai (ST), 3-Raliang (ST), 4-Mowkaiaw (ST) waka 7-Amlarem (ST) Assembly Segment.
Kamtæ hajrong ini, u District Election Officer yong ka West Jaiñtia Hills District, da kyntu u ya waroh ki 2,07,374 ngut kiwa thap Vote hapoh ka District yong i, wa kamwa da mih ryntih ki wow thap Vote haka Election MLA 2023, wa dadep, kamjooh hi u mih ryntih ki ha kani ka Election MP 2024 leh.
Heijooh i por u District Election Officer da ong u wa ki paidbah ym hoi u artatien næ u tieñsar ki yei krehkaam ki kor thap Vote EVM wa VVPAT neibhah ya ki VVPAT da chna pyntikna yow ye ki paidbah u pynsakhiat wa ka Vote yong ki psiah ko cha u kyrtong wa da jied hi ki.
Kamtæ da kyntu u ya ki paidbah wow ya chimbynta ki hei wow jied ya kiwa mihkhmat ha ki por Election iwa man leh kam ka dak wow pynyoo wa i man i kitæ kiwa chong chnong kiwa em yei kitkhlieh neibynta ka chnong ka thaw waka ri hi waroh kawi.
Kamjooh leh da ong u wa deiwa pyndep i yaka hok thap Vote yong i pynman ko ya i wow man i kiwa sñiawsarong wa da embynta i hei kaam synchaar khadar hapoh ka ri yong i. Heijooh i por leh, deiwa em i ya kiwa mihkhmat ha ka sorkar pyrdi, yoh i ya ki bru ki wow yasaaid neibynta yong i heitai ha sorkar pyrdi, i wow man i myntoi wa i kyrkhu wa khroo neibynta yong i kam kiwa chong chnong yong ka West Jaiñtia Hills District waka jylla Meghalaya hi waroh kawi.
Discussion about this post