Ka yung krehkaam u District Transport Officer, East Jaiñtia Hills District ynne deiwa ya krehlang wa ki bor District ka East Jaiñtia Hills da pynman ki yei pynsñiawthooh paidbah heiyatoh wa emkaam wow syndong ya ka yingkieñ wa tip kam ka Ri-Manar Bridge kawa em ha chnong Samasi hapoh ka Sutnga-Saipung Block.
Da ya emlang ha kani ka sngi wa u District Transport Officer (DTO) ka East Jaiñtia Hills District, u P. Laloo, u Motor Vehicle Inspector (MVI), u H. Dkhar, u Enforcement Inspector, u K. Tynsong, u Junior Engineer ka Public Works Department (PWD), NEC, Sutnga, u L. Shadap, u Dolloi ka Elaka Sumer, u K. Mannar, ki waheh chnong, kiwa chong chnong wa kiwi de.
Neiliang u MVI hawa e yei klam da khana u wa hadooh katwon da tlot kani ka yingkieñ wei da khana u ya kiwa boon ki daw wa yah cha ini i tlot kani ka yingkieñ wei da sneiñ u ya kiwa yah kari wow syndong bha ki wei ymtoh u kit palat pood hawa lai na kani ka yingkieñ yow lait nei jia wa sñiawsih.
Da ban joor u yei emkaam wow pynneh pynsah ya kani ka yingkieñ kawa emkaam bha ya ki paidbah kani ka thaaiñ deiwa kyntu ya ki paidbah wow pynpoor ki ya ka wyrta wa emkaam wym toh u kit palat pood kamjooh leh ki chnat sorkar nadooh ka chnat Transport, PWD wa Police wow leh ki yeini yow lait kani ka yingkieñ u kheiñ.
Kiwi de kiwa klam leh da ban ki yei jooh wa emkaam wow syndong ya kani ka yingkieñ neibhah em du kani donhi ka yingkieñ.
Neiliang u Dolloi da kyntu u ya ka chnat PWD wow thoh cha ka sorkar yow chna noh da kawi ka yingkieñ yow lait ki paidbah u chem chitom.
Discussion about this post