Kam chibynta wow kynmoo warom ya ka Gandhi Jayanti wei wow pynkut leh ya ka Swachhata Hi-Seva Campaign 2025, da pynman yei pynkhooid ya ki yaaw ki haat wa em ha chnong Jowai wa pynman da ka Jowai Municipal Board deilang ka Jaintia Traders Association (JTA), ka Dorbar Chnong Tympang Iawmusiang wa ka Market Committee ka Seinraij Jowai, ka CNI wa Yaaw Chyiap.
Hachwa wow sdang yei pynkhooid chnong, da em ka yalang heiwa ka D.V. Lyngdoh CEO ka Jowai Municipal Board da pynkynmoo ko yei angnood u Mahatma Gandhi yei emkaam i khooid i jngiar, kamtæ da kyntu ko ya kiwa chong yaaw, kiwa pynlai yaaw wow pynman ya ka soodong sookun kawa khooid deiwa pynlang yei jhep ha ki thaw wa da booh yow suk u wan kit ki kari ka Municipal.
Neiliang u Puramon Kynjing, Dolloi ka Elaka Jowai da ban joor u yei emkaam wow man kiwa lehkhooid deiwa kyntu leh ya ki khynnah skur wym toh u noh yei yusong baam cha luti syngkieñ yow man ka nongmuna ya ka chnong ka thaw.
Ya ka yalang da pynlai da u P. Lyngdoh, Chairman ka Jowai Municipal Board.
Heini i pynkhooid da chimbynta deilang ka CEO ka JMB, u Chairman ka JMB, u Dolloi wa kiwa mihkhmat ka Dorbar Chnong Tympang Iawmusiang, ki Market Committee, ki dkhot ka Jaintia Traders Association deilang kiwa chong chnong, kiwa chong dukan, kiwa dai baam chirup kiwa kreh ka Municipal wow lum wow pynkhooid yei jhep wei wow sait leh ya ki dukan, ki Railing wa ki thaw wa em ha soodong ki yaaw ki haat.
Discussion about this post