Shillong: Ka sorkar Meghalaya ynne da lehwarom ko ya ka World Environment Day heiwa ha Shillong, da pynman ya ka lehwarom da ka chnat Forest and Environment chirup wa ka Shillong Golf Club, ka Police Training School, Mawroh wa ka Dorbar Shnong Golflinks ha Shillong Golf Club hajrong ka phang “Air Pollution”.
U kongsan ha kani ka sngi toh u Lahkmen Rymbui, uwa man u montri ka chnat Forests wa kiwi kiwi, uwa da ong wa hanlada ka la-ær da man bih ko ha kylleiñ ka ri tangwa hapoh jylla ympu sñiaw ware yei ktah yong ka.
Da ong u wa ki paidbah ka jylla man ki kiwa embhah dooh wow riñ mynsien da ka la-ær wa khooid tangwa man i iwa sñiawkhia wow tip kammon man namo iyi wa em ha ka la-ær wa em ha talawiar yong ka jylla lada ktah i ya i doh i pran ki bru.
Heijooh i por da kyntu u ya ki chnat sorkar, ki sorkar, ki karkhana, ki chnong wa ki imlang sahlang wow thooh ki laad wow yaleh u wanrah biang ya ka la-ær wa khooid ym du hapoh ka chnong, ka jylla, ka ri tangwa wot ka pyrthai waroh kawi.
Ha kani ka sngi u montri ka chnat i chait i khiah, u AL Hek uwa da man kam u symbood kongsan wei da ong u wa ki bru katni da sdang artatien ki wow kreh wow yada ya ka Rymaw neibynta ka mynried yong ki. Da ong u leh wa em chiboon ki aiñ hapoh ka ri kiwa thrang wow yada ya ka la-ær tangwa boon hi na ki ym em de u pynkrehkaam ya ki.
Katwa kamtæ neiliang u Hek da kyntu u ya ka sorkar wow booh ka rukom krehkaam wow yada ya ka mynried.
Discussion about this post