Hadien i ood i naam ki paidbah wa chong wa sah hajan ka kchaaid Krangsuri kawi na ki thaw uiñke suwari wa bna naam kawa em hawah ka chnong Amlarem wa da maad ki yei eh i chitom nei khang ya ka luti lai kjat cha ka kchaaid da ki bor pynlai District ka West Jaiñtia Hills kattu da palat 4 bnai haroh neidaw wa oor i kynroh wa da chna ha chrooh kani ka luti lai kjat, kamtæ ynne ka sngi u MDC ka War Central, u Jamshaphrang Pohtam da lai li pait u ya kani ka luti kawa tip kam ka Shmea Leskor kawa da chna nadooh i por u Syiem Jaiñtiapur.
Ha ini i lai li pait, u Jamshaphrang Pohtam da ong u wa ki paidbah da pynsñiaw ki i sñiawkhia hajrong i khang slem ya kani ka luti khlem leh iyi iyi ya kani ka kynroh wa da oor.
Neibhah nadooh wa oor kani ka kynroh ki paidbah da saja ki wow lai tong um, lai sait that, lai sum wei heijooh i por da pyndooh nong bha ko ya ki neibhah wa kiwa uiñke suwari ym yoh laad de ki u pynemkaam ya kani ka luti wei boon kiwa chong dukan leh da dooh nong ki neidaw wym em de kiwa thied wa pet.
Ong u wei tieñ haroh ki boi kani ka luti lai kjat kawa da tipmit kam kawi naki dak kti sahnaam ki longchwa manchwa u dooh u dam ko la jia ym pynsmat u sumaar u pynkhooid.
Najrong wa i pynsahteiñ wow pynkhoid ya ka hadooh katni da pynartatien ko ya ki yaboi em i thmu wa da murieh.
Hadien i hiar lai pait u MDC, khana u wa da lai yachem u wa ka SDO ka Amlarem Civil Sub-Division wei da khut yalang ko heipor 3:00 waje wa da emlang nadooh ki bor District ka West Jaiñtia, u BDO ka Amlarem C&RD Block, ka chnat Tourism, ki bor pulit, ki tre kynroh, heiwa da yaklam yachem yumut ki wow leh iyi ræ iyi mar ya rang slap najrong wow pynkhooid noh.
Neiliang u Jamshaphrang Pohtam da kyntu u ya ki tre kynroh wa lada em ki i sñiawlem para bru wow ya im ya kulang ha ki liang waroh, toh u sumaar wei pynneh pynsah ya kani ka luti yongrim.
Kamjooh leh kyntu u ya ka SDO wa kam kawa kreh neibynta ki paidbah toh u leh ko iwa bha tam khlem pyndem ha kiwon kiwon ki bor lada toh ki bor yong ka saiñ hima-sima.
Discussion about this post