Kyntu u montri wa u CEM ya ki paidbah ka Block-I wow Register thaw cha Meghalaya

Jowai: Ka thaaiñ Block-I da mih khubor ko dei langær neidaw wa man ko kawa yakajia pood hapyrdi ki ar tylli ki jylla, ka Meghalaya wa Assam wei ynne ka sngi kiwa mihkhmat na ka Ri-loom Jaiñtia wa kynthup ya u montri ka chnat Fisheries ka jylla uwa man leh u MLA ka Raliang, u Comingone Ymbon wa u CEM ka JHADC u Thombor Shiwat da klam ki hajrong kani ka phang ha ka yalang lehkmen dap 25 snem ka Psiar Upper Primary School.

Hawa klam ha kani ka yalang, u Thombor Shiwat da ong u wa hawa e yei klam da tyrwa u ya ki paidbah na ka thaaiñ wow wan Register ki ya ki thaw yong ki ha JHADC mynkna wei kini kynthup ki nadooh ki thaw rep hadooh ki thaw sah wei ymtoh wow e ya ki cha Assam neibhah wa kwah ka Meghalaya wow pynskem yei mantre yong ki kam ki Pnar.  

Da ong u leh wa nadooh ka Council hadooh ka sorkar jylla kwah ko wow wanrah yei chongsuk iwa pura ha ka thaaiñ. Da pynrap u leh wa em ki bru kiwa leh EPIC ha Assam kamjooh leh ha Meghalaya wei ini man i iwa pyndooh bor wei iwa ktah yei chongsuk.

Kamtæ wow pyndooh noh yei eh da kyntu u ya ki paidbah ka thaaiñ wow chim ya ka rai wa skem wa kut yumut wa kam ki Pnar nadooh i ktien i thylliej ka riti dustur toh u sñiawthooh ki wow pynskem yei man yong ki kam kiwa na Meghalaya wei ymtoh wow chah pynbiej ha ka Assam.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Chooh chooh da pyntip u wa ka Council da phah ko ya ki Elaka waroh wow thoh noh ki ya ki chnong wa haap hapoh yong ki Elaka wei wow thoh ya ki dustur ki riti hapoh ka Elaka khnang wow tip noh ya u pood u ang wa paka.

Neiliang u Comingone hawa e i klam ha kani ka yalang da kynmoo u ya ki por wa man u kam u MLA ka thaaiñ ha ki snem 2008 heiwa da khana u ya i rukom pyndik ka Assam hawa wanrah ya ki kaam pynroi ha ka thaaiñ. Da ong u wa heipor wa wanrah ya ka bordiñ ha ka chnong da pynhaap ya ki chrot tangwa ka Assam da wan kit ko ya kini ki chrot waroh.

Heijooh i por da pyntip u wa ka sorkar jylla da thoh ko cha ka Assam wow chna da ka Committee on Boundary wow pynbait noh ya u pood tangwa neiliang ka sorkar Assam da kyntait ko yeini i tyrwa.

U Comingone da ong u leh wa ymtoh u man ki ki bru kiwa arsap heiwa em ki bru samen kiwa da Register ya ki thaw yong ki cha Assam (ini i leh wanrah ko yei eh i khoo kamwa da mih na ki por cha ki por) deiwa kyntu ya ki paidbah waroh wow Register ya ki thaw cha Meghalaya.