Hadien wa da sdang poor biang ka khlam COVID-19 hapoh ka Ri-loom Jaiñtia wa ka jylla hi waroh kawi, neiliang u Rev. Fr. Ferdinand Dkhar. Vicar General, Diocese of Jowai da e u ya i kyntu ya ki khon ka Ri-looom Jaiñtia wa ki khon ka Balang deiwa kyntu wow yakrehlang wa ka sorkar wow man ki bru kiwa husiar wow bood ya ki kyndon wa da booh ka sorkar khamtam heiyatoh wa kani ka khlam.
Da ong u wa ha u Wisu (March) ki Balang waphær waphær da yoh ki ya ka chithi na u Deputy Commissioner ka West Jaiñtia HIlls District wow pynkynmoo ya waroh wa emkaam u sneiñ kyntu ya waroh wow yakrehlang wa ka sorkar wow pyndooh pyndam ya kani ka khlam kjut.
Neiliang ka Balang Catholic da phah ko ya ka chithi cha waroh ki Balang Niam wa ki Parish wow kyntu ya ki paidbah wow bood ya ki kyndon sorkar wei wow man kiwa syndong.
Ka Balang Catholic da khut ko ya waroh wow ngooh ya u Blai yow ye i wow lait na ini waroh wa da ktah joor ya i lai i wan khamtam ha kani ka tayaw wa em ka Curfew, wei ini da ktah i chiboon chah khamtam kiwa khih mylla sngi kamtæ emkaam wow ngooh ya u Blai wow pynlait noh na kani ka kjut.
Da pynkynmoo u leh ya ki kyntien u Blai kiwa ong wa u Blai toh uwa dap dei maya wei uwa wyrai, wei uwa emlang wa i hadooh wa wai ka pyrthai.
