Kyntu u Wailadmiki wow yatylli ha kini ki por wa em i kynaad ka ri waka Pakistan wa Bangladesh

U MLA ka Jowai uwa man leh u Chairman ka MUDA, u Wailadmiki Shylla da ong u wa emkaam wow burom ya ki chipai ka ri wei emkaam leh u man kiwa yatylli.

Ya ini da ong u ha ka yalang wa pynman hei wow pynlait ya ka Special Cover wa ka Pictorial Cancellation yong u khlawait ka Ri-loom Jaiñtia ha Kiang Nangbah Government College.

Ha kani ka yalang, u Wailadmiki da ong u wa katkam wa man katni joor bha i kynaad ym du hapyrdi ka India wa Pakistan tangwa wot wa ka Bangladesh heiwa dang ha ki sngi wa dadep da em u heh kani ka ri uwa maham wow knieh wow hiar thma ya ki ynñiaw jylla ka thaaiñ North East lada ka India hiar thma ko ya ka Pakistan.

Heiyatoh wa ini, da ong u wa emkaam bha wow man i kiwa yatylli kamjooh leh wow burom ya ki chipai ka ri neibhah chem chitom ki chiboon bha khamtam wa rai ki wow pynchah dei mynsien neibynta wow laitlooid wei wow yada ya ki paidbah ka ri.