15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt

Kyrchaan ka Dorbar Chnong Umkiang wow kyrriah ya ki BSF na Sonapyrdi

0 Comments
Advertisement ad1
Advertisement ad1

Jowai: Ka Dorbar Chnong Umkiang, da e kyrchaan ko ya ka Dorbar Chnong Sonapyrdi, hajrong i dawa wow phah pyndam ya ki BSF wow booh khyrdop yow pynsangeh kari hapoh ka chnong Sonapyrdi.

Ka Dorbar Chnong Umkiang da ong ko wa ini i dawa yong ka Dorbar Chnong Sonapyrdi man ko kawa em nia em yurim. Iwa nyngkong toh wa pynwit pynthut ya i lai i yieñ yong ki paidbah iwa da pynmih yei sahkut ki kari iwa daw ktah khamtam ya kiwa kjut wa chitom kamwa da yoo neidaw wa ka thaw man ko kawa khynnia. Iwa ar toh wa ki pulit em ki i bor wow leh ya ini ym toh wa hadooh wow hap leh da ki chipai wa toh u pait yaka pood ka ri u wan ki cha ka National Highway.

Lada kamni, da ong wa pynyoo wa ki pulit yong ka jylla ym man ki kiwa biang wow kreh yaka kaam wa da pynkit ha ki. Kamtæ ini i leh yong ki BSF man ko kawa sñiawsih hadooh kattæ kattæ neidaw wa ym burom de yaka Dorbar Chnong wei ini i yooh beiñ da ki bor chipai man leh wa ym hoi ka sorkar Meghalaya.

Na kini ki daw, ka Dorbar Chnong Umkiang da kyrpaad joor ko na ka sorkar lyngba ka yung krehkaam u DC wow kyrriah noh ya kani ka thaw sah wa da chna ki BSF ha Sonapyrdi næ wow kyrriah noh ya kitai ki BSF cha Lumshnong Police Station neidaw wa ka thaw man ko kawa rap kyllooid yow lait noh na i sakhut ki kari.

Ini toh katkam ka kyrwoh khubor na u Lasting Pala, Waheh Chnong Umkiang wa u Nicholas Lyngdoh, Secretary chnong Umkiang.

Share this:
Previous

Mynsoo 22 ngut wa kynthup ya ki BSF, khlaad uwi hadien wa kylla ka bus ha EJH

Next

Pynbna ka chnong Mutong ya ki ar thaw kam ki Fish Sanctuary