Ka seiñ FKJGP-East Jaiñtia Hills District da e ko yei kyrchaan wa pura ya kiwa chong chong ka Elaka Narpuh hapoh i yahkhmat ka JAC wow pynman yei yakhih deiwa khang khlem da booh por ya u sarok NH-6 hapoh ka thaaiñ Elaka Narpuh neidaw wa da joor sih palat uni u sarok nadooh na Mynkre hadooh Malidor.
Ka seiñ da ong ko leh wa uni u sarok ym em da man u kam u National Highway, uwa katni da yoo lakam ka wah nei wan ka um wa tymmoh wei kam ka seiñ neipor cheipor da dep booh ko dei thoh lyngba u District Magistrate ka East Jaiñtia cha ka sorkar jylla yow dawa pynchna ya uni u sarok tangwa ka sorkar ym em kheiñkor ko yeini i dawa.
Da ong leh wa nachwa hawa chimkti da ka GREF yow chna ya utai u sarok, ki paidbah na kiwi ki thaaiñ da thrang mynsien ki wow poi cha thaaiñ Narpuh neidaw wa bha u sarok tangwa katni nadooh wa chimkti ka NHAI, ki paidbah da kyntait wei da ngiah ki wow hiar cha ka thaaiñ Narpuh neidaw wa sih palat u sarok wot ki kari heh leh ym ye de ki wow lai wei ym boi yaklam de ya ki kari khian iwa pynyoo wa ka NHAI ym em man ko kawa biang wow chna ya utai u sarok NH-6 wei da man u leh uwa dai sarom ya ka jylla neibhah wa lyngba uni da lai cha kiwi ki jylla kam ka Mizoram, Tripura, Manipur wa Assam.
Ka seiñ da kwah ko leh wo kylli ya ka sorkar jylla hawa ym ye u pynchan ya u sarok, kammon u ye phi u klam pathan u wanrah da ka luti rel.
Discussion about this post