Neiliang ka FKJGP Laskeiñ Circle dap ko da i sñiawsih wa khroo hajrong i chah pynyap dusmon ka khynnah skur kawa puræ ha ka Tia Chaphrang Higher Secondary School Sohkymphor ha ka 16 tarik uni u bnai heiwa yei metyap da chem haka sngi wa bood ka 17 tarik.
Neiliang ka seiñ da beiñ joor ko ya ini wa jia khamtam yaki damok wa emkti wow leh ya ini ki wym em mynsien bru de wow chim yei mynsien ka khynnah kynthai, ka khynah skur deiwa suba leh toh kawa da chah slaitbor wei da pynkut yei mynsien deiwa ah ya u rdang.
Ka seiñ da ong ko wa ini i leh kini ki damok da pyntieñ ko ya ki khon ki kti, ki payu para yong i leh. Kamtæ ym kwah leh wa kam kini ki bru u em ki hapoh ka chnong ka thaw wei kam ini i jooh ym toh wow jia biang i.
Ha i jooh i por da e yei kyrchaan kawa pura yei dawa yong ki khynnah skur wow pynchitom ya ki damok dei wow sdien pasi syndon ya kiwa emkti.
Kani ka khynnah toh ka khonswet, i chnong tre ko toh na Laskeiñ Block, West Jaiñtia Hills wei da lai chong sah ko waka beikhian yong ka ha Sohkymphor, East Jaiñtia Hills.
Ka seiñ da e khublei ko leh ya ki dkhot yong ka seiñ wa ki bor pulit yong ka East Jaiñtia Hills kiwa da chimkhia hajrong kani ka kaam, pynkut ka khubor na u Melamlynti Sumer, President FKJGP Laskeiñ Circle.
