Kyrchaan ka JSU yei yakhih ki wakreh 108

Jowai: Ka Jaiñtia Students’ Union (JSU) da kyrchaan ko yei dawa yong ki wakreh EMRI 108 na ka sorkar, ki dkhot ka seiñ hapoh i yahkhmat u President ka seiñ u Lawyerson War deilang wa u President ka Shillong Circle u Treiborlang R Suchen wa kiwi de ki para dkhot da yoh ki wow yachem ya ki wakreh ka EMRI ha J.N. Stadium, Polo Ground Shillong ynne i step wei da pynsñiaw ki yei sñiawkhia yei eh wa chem ki heiwa da chah lehbeiñ ki wakreh ka EMRI 108 ha kiwa pynlai ka GVK EMRI wei ka seiñ JSU da kyrchaan ko ya ka seiñ ki wakreh hapoh ka seiñ yong ki ka MEMRIWU kiwa dawa yei hok yong ki.

U Lawyerson War da ong u wa ka seiñ ka dap ko da i sñiawngooh ya ki wakreh ka 108 kiwa da e i chakri hok ya kiwa chong chnong ka ri-loom Jaiñtia khamtam cha ki thaw nongkyndong kiwa im jngai na ki PHC wa CHC, wei da ong u leh wa ka sorkar toh u chah chkoor ko yei eh i khoo ki wakreh ka EMRI neibhah ki toh kiwa ye u chakri ya ki paidbah kamwa leh lang kiwi kiwa chakri paidbah ha ki chnat sorkar wei iyi i eh wow pynbiang ya i dawa yong ki wakreh EMRI khamtam wow pynbiang ya ka tulop ka yong ki wa kiwi kiwi ki kor sumaar hapoh ki kari Ambulance.

U President ka JSU Shillong Circle u Treiborlang R Suchen da ong u wa lada ka sorkar ym ap ko ya i dawa yong ka MEMRIWU, ini mut wa yoobeiñ leh ya i hok yong ki paidbah, u Treiborlang da pynkynmoo wa ka GVK EMRI da jan dap ko chiphaw snem wow chakri ya kiwa kjut wa chitom ya ka jylla Meghalaya, wei da chakri ki hadooh 1,50,000 tam kiwa kjut wa chitom ha waroh ki District yong ka jylla Meghalaya wei ki wakreh da pyllait im ki ya kamwa 17,000 tam kiwa chitom wa 5000 ngut kiwa da kha khon hapoh i sumaar yong ki wakreh ka EMRI 108 heipor wa dang kit ya ki cha ki thaw sumaar næ ki Hospital.

Kamtæ da kyntu u ya u montri ka chnat ka chait ka khiah wow ap u yeini i dawa ki wakreh wei boon na ki toh ki tre jylla wei i chitom ki paidbah man ko leh i chitom ki paidabh kiwa em hapoh ka Constituency yong oo hi leh.