Ka TUR da e ko yei kyrchaan wei yieñ lang ko wa ka Environment Coordination Committee yong ka Elaka Sutnga kawa da pynman ya ka Rally lai paidbah ha East Jaiñtia Hills pyrchah ya ki karkhana saiñ mooyong namo ki Coke Factory wa krehkaam pyrchah ya ka aiñ wa i leh benami hawa wai ya kini ki karkhana pyrchah ya ka aiñ.
Ka TUR da ong ko wa kini ki karkhana wa da wai toh kiwa da tyngkheiñ ya ka aiñ yada rymaw khlem leh ya ka EIA. Kini ki karkhana toh leh u yoh ki yei mynjur da ka chnat State Environment Impact Assessment Authority (SEIAA) wei leh na ka State Environment Appraisal Committee (SEAC). Toh u yoh ki leh yei mynjur na kini wym toh u booh næ chna ya kini ki karkhana ha ki thaw wa chajan wa ki chnong bru, ki khloo wa em ki mrad ki mreng, ki lyngkha ki hali, ki tyllong um wa ki thaw uiñke pyrthai.
Ka Single Window Policy kawa da khlieh wei pait da u Montri Rangbah toh ka wym kheiñ iyi iyi leh ya ka aiñ, ki kyndon wei da thombor ko ya ki chnat yada rymaw khlem pyrkhat ya i chait i khiah wa i bha kiwa chong chnong salonsar.
Kamtæ da ong wa da kini ki chnat sorkar da pynemkaam bakla ki yei bor deiwa e Certificate khlem da pait wei deiwa tyngkheiñ ya ki aiñ wa ki kyndon.
Kamtæ ka TUR da dawa wow khang noh chisyndon ya kini ki karkhana pyrchah ya ka aiñ.
Ka TUR ka dawa ko leh wow pynchitom ya ki heh yong ka Meghalaya Pollution Control Board, ki dkhot yong ka SEAA wa SEAC kiwa da kheiñstiñ wei pynemkaam bakla ya ki bor deiwa chah ya kini ki karkhana pyrchah ya ka aiñ.
Da khut da wer leh ya kiwa chong chnong ka jylla waroh kawi wow kyrchaan ya kiwa chong chnong yong ka Elaka Sutnga.
Ka TUR da kylli ko leh na ka sorkar wa ya u mooyong uwa da saiñ ha kini ki kharkhana wan u neiwon wei kiyi kiwa chalan ya oo?