theme-sticky-logo-alt
theme-logo-alt
Advertisement ad1

Kyrchaan ka UDP-East Jaiñtia wow thung MDC da uwa na Ri-Bhoi ha KHADC

Ka United Democratic Party (UDP) na East Jaiñtia Hills (EJH) da sñiaw yahaap ko wa i dawa ka chnat ka seiñ na Ri-Bhoi wow yoh bhah hei thung MDC (Nominated MDC) wei hajrong ini, u President ka UDP-East Jaiñtia Hills u Finely Bareh da ong u wa man iwa sakhiat wei iwa yahaap wa ka UDP ha Ri-Bhoi toh u yoh bhah ko wow sai ya kam kini ki MDC lada lai katkam ki kyndon wei lada kiwa kitkaam ym em ki iwon iwon i sñiawphær neibhah wa katkam wa man katni ka seiñ na Ri-Bhoi ym em ko ya u MLA wot u MDC leh.

U Finely da ong u wa ya ka bhah MDC wa thung donhi da toh u yoh na ka UDP na Ri-Bhoi kawa ym em ya kiwa mihkhmat paidbah hadien wa ymyoh ko yei jop ha ka Election MLA wa MDC wa dadep, khnang wa kam ka seiñ daw ye ko wow pynkrehkaam wow yarap katwa ye ya ki paidbah wei kamjooh leh wow nang ye u pynlai ya ki kaam wow pynkhlan leh ya ka seiñ ha Ri-Bhoi.

Da emkaam bha ya kiwa yahkhmat wow kyruiñ ki cha Ri-Bhoi khamtam wow dang ye u kyntu kynrong ya ka seiñ wow pynkhreh ya ka Election ha u 2023, tangwa kamwa man katni, cheiwon ki paidbah u lai ki, da ong u Finely deiwa pynrap wa lada emkaam, ka UDP East Jaiñtia Hills ka smat ko wow e kyrchaan wei pynsñiaw biang ya kani ka kaam cha u President ka seiñ, neibhah wa man ko i pynsñiaw wa sñiaw yahaap wa toh u em ki ya kiwa mihkhmat wa ye u yarap ya u paidbah, neibhah wa kamwa man katni lada pait cha East Khasi Hills, ki da em ki ya u MLA wa MDC.

Katwa neiliang u President ka UDP Ri-Bhoi District u Donbok Khymdeit da ong u wa ini ym toh de ka phang kawa dang mih katni, tangwa toh kawa da em chwa nadooh i por wa ki wa ki snem, wa ka Ri-Bhoi ym em de ko ya ki MLA wa MDC hadien wa chah rem noh ki.

Da ong wa kani ka bynta da dep leh wow yaklam nadooh i por man President yong u Dr. Donkupar Roy (bam kwai ha dwar u Blai) wei toh leh ka phang kawa da lai nadooh ki 2-3 snem nachwa wa da wanrah ya kani ka phang yaklam ha katu ka por wa la kammon kammon neiliang ka seiñ lada em ko ka laad, toh u booh næ sai ya u Nominated MDC na Ri-Bhoi, tangwa hawa i por da lai, da yoo wa ka seiñ da thung ko da u Bindo M Lanong wei kamtæ ini i kaam leh da kut noh kamtu.

U Donbok Khymdeit da ong u wa u Bindo da man sakhiat wa em hok wow yoh ya kani ka chuki neibhah wa toh u bru wa chemphang bha ha kani ka kaam wei neiliang ka seiñ ym em ko iyi iyi wow ong hajrong ini.

Hawa kylli, u Donbok da ong u hao, toh i emkaam ya ka dong Ri-Bhoi tangwa ym toh won iwa da thrang kdik kdik ware, wei da pynsñiaw u wa ha kitu ki por wa da lai noh leh toh du neidaw wa kam ka dong Ri-Bhoi ym em wa mihkhmat de, kamtæ hawa yoo yeini wa em ka laad, da kwah wow pynyoo yei sñiaw hajrong ini.

Share this:
Previous

Jubab u Mukul yaka ujor ka Congress pyrchah ya kiwa yut seiñ

Next

Ki por wa chah u thang bomkala heipor Christmas wa snem thymme ha West Jaiñtia