Ynne ka sngi da pynman ya ka dorbar mang tyngka ka JHADC, wei ha kani ka dorbar u MDC ka Jowai Central u Awhai Andrew Shullai uwa man leh uwa yahkhmat ka liang pyrchah, da tyrwa namo da wanrah u ya ka Resolution ha kani ka dorbar.
Da ong u wa ka Council chem chitom bha ko heiliang ka poisa poilaiñ wei ini da poi i hadooh u pood wymye de u su tulop kattu la 6 bnai.
Da maham u leh wa ini lada pteiñ i daw poi hadooh u pood wymye de u pynlai ya ka.
Da ong u leh wa ka Council yoh poisa ko na ka bhah (Royalty) na u mooyong wa kiwi ki mar poh khyndaw heiwa na ki mar lait na u mooyong da yoh ko 60% katwa na u mooyong won 25%.
Heiyatoh won wa ki kaam tih mooyong won katkam ka Mines and Minerals (Development and Regulation) Act, 1957 wei i lilam ya u mooyong daw sdang noh i wei kamtæ emkaam wa ka Council u yoh ko ya ka bhah yong ka.
Da ong u wa u lat embor u wow rai ya ka bhah na u mooyong wow yoh ki District Council da pynkynmoo u wa ka Paragraph 9 (2) yong ka Sixth Schedule ka Constitution of India, lada em i wym sñiawthooh næ wym che hajrong ka bhah, yeini ye u phah cha u lat wow rai hajrong ini. Kamtæ da tyrwa u wa ka Council toh u ujor ko cha u Lat khnang wow yoh bhah noh mar chiteiñ namo 50:50.
Hajrong ini i tyrwa, ki MDC ka Council da pdiang ki yeini i tyrwa wei hawa yaklam wa u CEM ka Council, u Thombor Shiwat hadien ka dorbar, da pyntip u wa ka EC da rai ko yeini wei da thoh cha ka sorkar hajrong ini, tangwa ympu tip kammon namo ileh slem ka sorkar wow rai yeini.
Discussion about this post