Ynne ka sngi, ka East Jaiñtia National Council (EJNC) lyngba u President Rangbah yong ka, u Sambormi Lyngdoh da pynsñiaw u yei kyrchaan wa pura heiyatoh wa i bynta wa wanrah u Ardent Basaiawmoit wa da toh i por wow sylli biang ya ka Reservation Policy kawa noh chiliang ware hawa kyruiñ cha ki por wa katni.
Da ong leh wa ya ka Roster System leh hap wow pynsangeh chwa deiwa pynrap wa ka Khasi wa Jaiñtia lada nujor katni wa kiwi ki paaid hapoh ka Bri Ynñiawtrep da boon ware ki wei ym yahaap de wow e bhah mar i jooh.
U President ka EJNC da beiñ u leh ya ki seiñbhalang napoh Ri-loom Garo heiyatoh wa i bhah kaam iwa mut i yong ki bait i myntoi khlem pyrkhat de ya ka jylla waroh kawi.
Khaddooh u Sambormi da kyntu u leh ya waroh ki 36 ngut ki MLA na Khasi-Jaiñtia wow man iwi don khlem kdaw kti iwi ya iwi wei wow pyrkhat ki neibynta ka jaitbru waroh kawi.
