U Symbood Montri Rangbah ka jylla, u Prestone Tynsong, uwa pait leh ya ka chnat PWD (Roads) da kyrhieh u ya uwi uwa mihkhmat ka ASC Construction Company kawa chna ya u sarok Pynursla-Dawki.
U Prestone uwa man leh kam u MLA ka thaaiñ da pynyoo u yei chrai hadien wa yoo dei khmat wa kani ka Company da noh khyndaw wei pyntyllung ko ya ki moo cha ka bri kwai wa em ha ka thaaiñ Wahkdait, Mawriang wa Pashum.
U Prestone deilang ki sahep wa ki bru ka NHIDCL ynne ka sngi da lai pait ki yei pynkreh ya u sarokbah Pynursla-Dawki wa da sdang nadooh yingkieñ Umshyrpi, tangwa hawa poi ha ka thaaiñ Wahkdait, kiwa yahkhmat chnong da pynyoo ki yeini wa leh dusmon katai ka Company, iwa da pynchrai ya oo neibhah wa utai u bru ka Company da yasaaid bait u deiwa pynbaad yei oor khyndaw.
Neiliang u Prestone da maham u leh deiwa khor ya utai u bru ka Company wym toh u pynbaad u wa jia ini nei oor khyndaw neibhah da yoo yeiwa sakhiat wa toh wa leh khnang. Katkam wa khana kiwa yahkhmat chnong i noh khyndaw heipor miet toh iwa joor bha hadooh wa da chah ban lut ki thaw rep kwai rep pathi najrong wa chah pynsih leh ki Pipe um JJM.
Neiliang u Prestone da rai u wow thung ya ka Monitoring Committee wow khlieh da u BDO hapoh i pait ka SDO wei wow bichaar yei maan ki kaam wei wow chim yukheiñ leh yeiwa da ktah kani ka Company ya kiwa rep yow su ko cha ki.
Neiliang won u Waheh Chnong ka Pashum, u Starning Pohtam da ong u wa ka Company ym bna ko yeiwa klam ki, wei i dooh nong ki toh iwa khroo ya kiwa rep ka Pashum, Mawryngkang, Wahkdait, Mawriang wei da em leh kiwa rep na West Jaiñtia Hills wa kynthup na Padu, Amkoi wa Shnongpdeng kiwa da chah ktah.
Discussion about this post