Ynne ka sngi dei mynsien wa sñiawkhia yei eh i khoo wa chem ki paidbah heiyatoh wa i dooh um ha Jowai, ka Synjuk ki Waheh Chnong Jowai hapoh i yahkhmat u President u Alan Niangti wa u Secretary, u Riquoma RQ Laloo da yachem ki ya u Executive Engineer ka PHE (Jowai Electrical Division) u Paul Synnah hajrong ini i kaam.
Heiyatoh wa ini u Alan Niangti da pyntip u wa i yachem toh khamtam wa yatoh wa i duna i pynooi um ka chnat cha ki manyung ha Jowai ha kini ki sngi wa dadep heiwa i daw wa duna i pynpoi um toh wa pyndooh bordiñ (Load Shedding) ka chnat MeECL tæ da thut i rukom pynpoi um.
Da ong u wa hadien wa pyndam ya ka Load Shedding da kyrmen wow lai bait i pynpoi um kattu ha Jowai neini wym thut wei ym duna de i.
U Niangti da ong u leh wa da yaklam hajrong ka Dam (Mupiah) ka PHE wa da piah ha ki bnai liyur yong u snem wa dadep wei ka chnat da chimkhia ko wow chna pynmiat ya i thaw wa da piah khnang wow lait i thut i rukom saam um ha Jowai.
Chooh chooh da pyntip u wa hajrong ka um na ka Wah Mynngot cha Jowai, u Synnah da pyntip u wa da yoh ya ka poisa wow kreh ya ki kaam wa sahteiñ wei yooluti leh wa ha u snem wow wan daw ye u pynpoi noh ya ka um na kani ka wah cha ki manyung ka Jowai.
