Ka National People’s Party (NPP) Shillong City, da pynsñiaw ko yei kyrchaan wa pura ya ka sorkar Meghalaya Democratic Alliance (MDA) kawa ye wow pyndooh smat yei eh wa mih nei pyndooh bordiñ wei kamjooh wa de ye wow pynhiar yei dor Petrol wa Diesel.
U Anthony Nongbri da ong u wa kani ka sorkar hapoh i yahkhmat u Montri Rangbah, u Conrad K Sangma da sñiaw ko yei sur ki paidbah, neibah wa ka toh ka sorkar ki paidbah wei ka sñiawthooh ko yei khia wa chon ha ki paidbah, deiwa da kam u wa kani ka sorkar toh kawa nyngkong wow pyndooh yei eh na i Load Shedding du hei kajiak por donhi, ym toh kam kiwi ki sorkar wa da lai.
Hawa yatoh wa i pynhiar ya i dor i dan wa da kheiñ ha i Petrol wa Diesel, da ong u wa deiwa ap wa sñiaw lang ka sorkar yei eh ki paidbah, katni i dor phniang kari hapoh ka jylla Meghalaya da duna ko ya i dor yong kiwi.
Hawa kylli, u Nongbri da ong u wa i yakhih yong kiwa yah kari kamai wa ym em i sñiawthooh yumut hapyrdi para ki, tangwa hawa yatoh wa ki paidbah ym pu hun yei pynhiar dor T. 2, wei ka sorkar da sñiaw ko ya ini wei da rai wow pynsuk ya ki paidbah wa ym e laad wow chah pynbaad, deiwa ong wa ym toh u ksoh nood yei slem kajiak.
Hawa kylli chooh chooh wa dang em ki phang wa sahteiñ wa kani ka sorkar ym ye ko wow pynbait hadooh katni, u Nongbri da pynksan u deiwa ong wa ka Them Mator, ILP wa i yakhih kiwa sikai ym toh ki kaam kiwa dang ini, tangwa toh kiwa da sah nadooh ki sorkar warim leh kiwa ym ye u pynbait, iwa mut em i eh wa hap wow pynbait, tangwa kani ka sorkar ka da pyrchang ko.