Ka Shangpung College da pynman ko ya ka “Awareness Programme on Drug Abuse & HIV/AIDS” ha ka 24 tarik uni u bnai ha yaaw Phramer hei pynlai da ka Internal Quality Cell (IQAC) ka Shangpung College deiwa ksohktilang wa ka yung krehkaam u Block Development Officer, Laskein C&RD Block, West Jaintia Hills District hajrong ka phang wa ong “Kyrngah Yei Kaam Wasih”.
U kongsan ha kani ka pynsñiawthooh paidbah toh u Dolloi ka Elaka Shangpung, u Chanki Langbang deiwa emlang kam u symbood kongsan, u K. Rani, Sub-Inspector, Phramer Traffic Cell deilang ki bru chemphang wa kynthup ya ka Mary Gold Papiah, Adolescent Counsellor, RKSK, National Health Mission wa ka Valdean Zonunsiami, ICTC Counsellor, Meghalaya Aids Control Society.
Kiwa ya chimbyntalang ha kani ka yalang toh u waheh dong yong ka Dorbar Dong Phramer, u S. Kyndait, ki bru ka M.H. & Sons Enterprise, u Principal ka Shangpung College, u Dr. D.G. Lyngdoh, kiwa sikai yong ka College, ki khynnah puræ wa kiwa dai wa thied wa em ha ka chnong Phramer.
Neiliang ki bru chemphang da batai bniah wei da pynche ki yei roi i pynemkaam drugs ha ka imlang sahlang wei da kdaw ki ya ki laad ki luti wa kammon u kiar na u khñiang kjut HIV/AIDS. Neiliang won Ki khynnah wa kiwa sikai ka College da ya chimbynta ki ha ka Drama hajrong ka phang “Kyrngah Yei Kaam Wasih.”
Neiliang u kongsan kamjooh u symbood kongsan leh da ki yei klam wei da pynkut ya ka yalang da ki kyntien khublei na u Mar Archeki Kympad.
Discussion about this post