Jowai: Ka seiñ All Hynniewtrep People United Front (AHPUF) hapoh i yahkhmat u President u J. Phawa wa u Secretary u C. Sungoh ynne ka sngi da lai kyrpaad ki na u Chief Executive Officer, Eastern Circle ka chnat MeECL, Jowai wow kyrriah noh yei por pyndooh bordiñ ha ri-loom Jaiñtia kawa kamwa man katni da sdang ko nadooh i por 9 waje i miet hadooh 12 waje pyrdi synyaw.
Da ong ki wa kani ktah bha ko ya ki paidbah neibhah wa smat ware i por tympleh, boon ki paidbah ha kani ka kynta dooh bordiñ ym pu dep ki tang u chet u tu, nalor wa ktah haroh ko yaki khynnah skur khamtam wada toh i por pynkhreh Exam ki.
Neiliang u CEO ong u wa ini toh i pynbait ki bor wa hakhlieh ka sorkar jylla wei yei tympleh kamjooh da leh ha ki thaw waphær waphær ka jylla deiwa booh jar jiar i por. Ong haroh u wa hei sakhiat da toh hi wow kylla yei por neibhah kani ka por da rap neh slem ko.
Heijooh i por ong u wa daw pynsñiaw u yeini i kyrpaad yong ki cha ki bor wa hakhlieh wei yooluti u leh wa ini i tympleh bordiñ ym slem de daw ye wow sangeh neibynta i myntoi ki paidbah.
Discussion about this post