Ka FKJGP-Jaiñtia Hills District ynne ka sngi da pynman ko ya i lai paidbah namo ka Rally na laad Kiang Nangbah Government College chadooh Iawmusiang wow dawa na ka sorkar yow pynbait noh ya u pood ka jylla wa ka Assam.
Ha kani ka Rally da wan chimbynta da ki spah ngut ki dkhot ka seiñ FKJGP, JSU, KSU, Synjuk Waheh Chnong Ri Jaiñtia wa kiwa chong chnong ha thaaiñ khappood kiwa da rah ya ki lama kamjooh ya ki kot-rben wa thoh ya ki kyntien wow dawa yeini.
Ha laad Kiang Nangbah Government College da em ka yalang wa tbian heiwa u President ka FKJGP – Jaiñtia Hills District, u Tuesday Lytep da kyntu u ya ki paidbah wow man kiwa jai-jai wei ymtoh wow pynthut yei lai i wan ki kari.
Ha kani ka yalang tbian da klam heiyatoh wa i chem chitom ki paidbah khappood nadooh na Langpih, Lapangap, Mukroh, Saba wa kiwi.
Hawa pynman yei lai paidbah da kbai leh ya ki kyntien wow pynsñiaw ya ki daw wa pynman ya kani ka lai paidbah.
Manda poi ha Iawmusiang da em won kawi ka yalang heh ya kawa da pynlai da u N. Ranee uwa man u General Secretary ka FKJGP – West Jaiñtia Hills heiwa da yoh i klam na ki President wa Secretary, ki Waheh Chnong wa kiwi kiwa da dawa na ka sorkar jylla wow pynbait noh ya u pood wa ka Assam.
Kawi ka manbei na Lapangap da ong ko wa katni da sdang ki wow hiar thung kamtæ da kyrpaad ko ya ka sorkar wow phah ya ki pulit wow yada ya ki.
Discussion about this post