Ka North East Students’ Organization (NESO) toh ka satri ki seiñ ki khynnah puræ na ki 7 jylla ka thaaiñ mihsngi wa kynthup ya ka All Assam Students’ Union (AASU), Khasi Students’ Union (KSU), Garo Students’ Union (GSU), All Manipur Students’ Union (AMSU), Mizo Zirlai Pawl (MZP), Naga Students’ Federation (NSF), All Arunachal Pradesh Students’ Union (AAPSU) wa ka Twipra Students’ Federation (TSF).
Neiliang ka NESO ha kani ka tayaaw da thoh ko cha u Prime Minister, u Narendra Modi wa u Home Minister ka ri, u Amit Shah wow pynsñiaw yei sñiawkhia hajrong i awri ha Manipur iwa da neh la 16 bnai kattu.
Da ong wa ha kini ki bnai da yap chiboon ngut, da chah ktah ki yung ki sem wei da em i chong syir ha waroh ka jylla deiwa beiñ ya kiwa pynawri ha ka jylla.
Chooh chooh da ong wa i dat Bomb wa i pynemkaam ya ki Drone dang pynheh i yeini i awri deiwa kyntu wow wanrah biang yei chongsuk dei yaklam yasuk.
Da ong leh wa ki paidbah ha Manipur em hok ki wow yoh yei chongsuk deiwa kyntu ya u Prime Minister wow chimkhia ya ini i kaam neibhah i wym ye u yahluti daw pynslem i yeini i awri.
Heijooh i por ong da leh wa i awri ha Manipur ye i leh wow ktah yei chongsuk ha ka thaaiñ mihsngi waroh kawi.
Kamtæ ka NESO kyrpaad ko ya u Prime Minister wow lai cha Manipur khnang wow sñiawthooh u yei chitom wa maad ki paidbah ha kani ka jylla wei wow wanrah biang ya ki bor yada ya ki paidbah.
Discussion about this post