theme-sticky-logo-alt
theme-logo-alt

Kyrpaad ka RUDS na ka sorkar wow kyrriah ya ka Shillong Medical College cha thaaiñ Laitkor

Advertisement ad1

Jowai: Ka seiñ Rural & Urban Development Society (RUDS), Khliehriat da ong ko wa ka sorkar Meghalaya katni da sdang ko wow thooh thaw wow kyrriah ya ka Shillong Medical College cum Hospital na Mawprem cha kiwi ki thaw kiwa rap kyllooid wei wa rap heh.

Kamtæ ka seiñ da ong ko wa ka sorkar da thmu ko wow kyrriah yaka Shillong Medical College cum Hospital cha Umsawli (New Shillong Township) kawa yajan wa ka NEIGRIHMS kawa da em chwa ki Project wa ki thaw puræ kiwa heh ha kani ka thaw kam ka NEIGRIHMS, NEIAH, NIFT, IIM, IHMTC&AN wa kiwi kiwi.

Advertisement ad1

Neini i daw ka seiñ da ong ko wa ym emkaam wow booh sa kawi ka Medical College cum Hospital ha kani ka jooh ka thaw kawa da em chwa ya ka artylli ki thaw sumaar wa heh kiwa da chakri hok ya ki paidbah ha kani ka thaaiñ.

Chooh chhooh ka seiñ da ong ko wa ha kani ka New Shillong Township daw khynñia ko wei daw man ko leh kawa tngit hadien ha bood neibhah i boon kiwi ki kaam wow pynkreh ka sorkar ha kani ka thaw.

Hajrong kani ka yurim ka Rural & Urban Development Society (RUDS), Khliehriat da pachat ko cha ka sorkar wow booh ha ki thaw wa biang wa kyllooid wow booh ya kani ka Medical College cum Hospital ha ki thaaiñ Laitkor neidaw wa man ko kawa yajan wei suk wow lai u wan wa kiwi ki thaw kam na Khliehriat, Jowai, Mawkynrew, Smit, Sohryngkam, Ri Bhoi wa kiwei kiwi de.

Heijooh i por ka seiñ da ong ko wa ka thaaiñ daw yoh myntoi bha ko chiboon bha lyngba i wan yong kani ka Medical College cum Hospital neibhah ha kini ki thaaiñ ym em wot tang kawi leh ka Hospital wa heh wa ka thaw sumaar wa paka.

Nalor ini, ka seiñ da ong ko leh wa kani ka thaaiñ leh man ko leh kawa biang kawa khooid wow booh ya kani ka Medical College cum Hospital wei lada ka Western By-pass u wan ko kamwa da thmu ka sorkar ki thaw kam ka Mylliem, Sohra, Pynursla , Mawkyrwat , Nongstoin, Ri Bhoi wa kiwi kiwi leh daw dang jan ki wei u suk wow poi cha ka thaaiñ Laitkor wei kamjooh u pynduna ya khynñia kari ka Shillong.

Kamtæ ka seiñ da kyrpaad ko ya ka sorkar wa waroh kiwa mihkhmat wow sñiawbha ki wow pyrkhat bniah din pa din chwa wow rai wow kyrriah ya ka Medical College cha Umsawli (New Shillong Township).

Share this:
Previous

Na Delhi pynman yalang wa kyrpang u Conrad wa ki DC ki BDO lyngba ka Video Conferencing

Next

Booh moo-yurim ka WEESFEPA wow pynneh pynsah ya ka wah Lakroh