Shillong: Kiwa sikai Contract ha ki skur sorkar hapoh ka Meghalaya Government LP School Contractual Teachers’ Association (MGLPSCTA) da kyrpaad ki yaka sorkar lyngba u montri ka puræ puthi wow pait lang cha ki kiwa sikai da boon snem, kiwa i kaam yong ki da em ko katni ha synrang hadien wa ka sorkar da pynbna ko ya ka Result yong ka Meghalaya Teachers Eligibility Test (MTET) ynnin ka sngi.
Hawa klam wa ki laad pathai khubor ynnne ka sngi, u Vice-President ka MGLPSCTSA, u Shining Kharsyntiew da pyntip u wa da em hadooh 1200 ngut kiwa sikai wa yakhun ya ka Exam MTET ynnin u snem, katwa kiwa Pass won da em ki du kamwa 10% wei ini da wanrah ko yei syier ya kiwa sikai kiwa da sikai boon snem wa daw dooh noh ki ya i kaam.
Na kini kiwa sikai da em napyrdi yong ki kiwa da chakri ya i kaam la 9 snem, da kyntu ki yaka sorkar wow tipmit noh ya ki kam kiwa sikai wa pura (Regularise) neibhah man ki kiwa sikai kiwa da lai leh cha ki kdong ki chmiang ki thaaiñ nongkyndong wow e yei stad wei wow saiñdur ya ki khynnah.
Hawa kylli, da pyntip wa ka Contract wa ki da ya soi ki waka sorkar man bait ko du neibynta wa 59 sngi, wei hadien da pynthymme bait ya kani ka jooh ka Contract. Chooh chooh da pyntip wa ka sorkar da pynthymme biang ko ha ka sien wa khaddooh ya ka Contract yong ki ha ka 18 tarik uni u bnai neibynta 59 sngi hachwa wow thung noh da kiwa sikai wa da pyndep ya ka MTET.
Hawa kylli chooh chooh, wa ka sorkar da e ko ka jooh ka laad wow yakhun ya ki Exam thung kaam lyngba ka MTET, neiliang u Paleilang Rani da ong u wa kiwa sikai ym poi pyrkhat ki wa ka sorkar daw pynmih chooh ya kam kani ka Exam neibhah ha i por wa thap ki wow yoh kaam, da pyndep ki katkam i emkaam wa da booh da ki bor wa haneiñ itæ wow yoh 45% chaneiñ ha ka Clas XII wei wow pyndep leh ya ka Diploma in Elementary Education (DElEd).
Kini kiwa sikai da kyrpaad ki leh na ka sorkar wow elaad thoh biang ya ka Exam du neibynta yong ki, deiwa e laad kyrpang neibhah wa da kreh ki ya ka kaam da boon boon snem.
Discussion about this post