Kyrpaad u AL Hek na u montri ka sorkar pyrdi wow chna ya ka Anti-Retroviral Therapy (ART) Centre ha Jowai

New Delhi: U montri rangbah ka jylla, u Conrad K. Sangma ynne chirup wa u montri ka chait i khiah ka jylla, u AL Hek da yachem ki ya u montri ka sorkar pyrdi wa pait ya i chait i khiah, u Jagat Prakash Nadda ha yung sah yong oo ha sorbah New Delhi.

Ha kani ka yachem neiliang u Nadda da kular u wow e yarap wa i kyrchaan wa pura ya ka sorkar jylla wow pynmiat pynbha ya ka tnat i chait i khiah hapoh jylla.

Da ya phyllu leh ya ki laad wow pynjanai ya ki thaw sumaar hapoh ka jylla heiwa u Conrad da ekti u leh ha u Nadda ya ka dorkhat heiyatoh wa ini.

Neiliang u Hek da pyntip u ya ki thaw sumaar wa da chna lyngba i yoh yarap na ka sorkar pyrdi, iwa da yarap wow pyndap yeiwa duna ha i rukom sumaar bru.

Related posts

Lai ood ki MDC ka VPP ha ka sorkar wym yoh Scheme sorkar pyrdi ha ki Constituency wa em ha sor

May 13, 2025

Lada ka sorkar sñiaw ko wa emkaam palat ko wow wanrah luti rel ye ko wow lai chakhmat: Ardent

May 12, 2025

U Hek da kyrpaad u leh ya u Nadda wow chna ya ka Anti-Retroviral Therapy (ART) Centre namo ka thaw wow e sumaar ya kiwa yoh ya u khniang HIV wa kiwa em AIDS ha Jowai yeiwa u Nadda da kular u wow e yarap na ka tnat wow yakhun pyrchah ya uni u khniang.

Chooh chooh u Conrad da pyntip u leh ya ka rukom krehkaam wa thymme yong ka sorkar jylla wa tip kam ka Free Drugs Policy heiwa da kyrpaad leh na ka sorkar pyrdi wow e yarap poisa cha ka jylla wow thied wei wow pynbiang ya ki dawai wa emkaam.

Heiyatoh wa i pynku kyrdan ya ki PHC, CHC wa ki Sub-health Centres deiwa pynksan wa emkaam wow pynku kyrdan noh ya ka Ganesh Das Hospital Shillong wei wow yarap ya ka Cancer Care Wing hapoh jylla.

Heijooh i por da kyntu leh wa emkaam wow booh ya ki Specialized Physiotherapy and Sports Injury Centre hapoh jylla khamtam heiyatoh wei wow pynkhreh ya ka National Games ha Meghalaya ha u snem 2022.

Da e khublei ki leh ya u Nadda wa da pynlait T. 189 Klur ya ka Tura Medical College wei da kyntu leh wow pynthymme (Revised Estimate) ka wow man T. 244 Klur.

Kiwi ki phang wa da yaklam toh ki tiar sumaar hapoh jylla ki wym krehkaam, heiwa u Nadda da kyntu u wow chim kabu ya ka Bio Medical Maintenance Programme, heiwa emkaam wow soi ya ka MoU wa ki Agency ki wow pait yeiwa duna ya kawa daw pynbiang poisa da kani ka tnat ka sorkar pyrdi.

Da yaklam leh wa ki kaam wa yatoh wa ka NEIGRIHMS heiwa u Nadda da kular u wow chimkhia wei wow boodien yeini.