U Nehemayah Tyngkan kam uwi naki bru pawkhmat yong ka thaaiñ Laskein Block West Jaiñtia Hills hadien wa da yoh u wow ap u sñiaw yei chitom yei jynjar ki paidbah ka thaaiñ waroh kawi, da lai yachem u wow BDO yong ka Laskein C&RD Block u Dr. B. Langbang deiwa e lang dei thoh wow kyrpaad ya u BDO wow thooh yaki laad ki luti u booh noh ya ki yaw kiwa chipor hapoh ka Laskein Block deiwa burom wei bood ryntih yaki kyndon yong ka sorkar hei wow yada naka khlam COVID-19.
Neiliang u N. Tyngkan da khana u wa em san tylli ki yaw wa rap heh hapoh ka Laskeiñ Block, ka yaw Iooksi, yaw Raliang, yaw Shangpung, yaw Mowkaiaw waka yaw Sahsniang. Waroh kini ki yaw da khang lut yaki nadooh wa sdang ka Lockdown hadooh katni. Kani da ktah joor bha ko yaki paidbah ka thaaiñ khamtam yaki warep kiwa pynmih yaki marbam mardih (ki mar pyut) kiwa jooh lai li dai ki ha waroh kini ki yaw, wei katkam wa man katni boon ki mar rep da sep-ai ki nei wym yoh dei u lai dai cha ki yaw ki haat.
Hajrong ini i eh, u N. Tyngkan da e yumut wei da kyrpaad joor u ya u BDO wow thooh laad wow wai ya kini ki yaw yow yoh ki warep u lai dai yaki mar ki mata yong ki, deiwa ya krehlang chirup chirup waki Dorbar Chnong wa ki VDP yong ki chnong.
U Tyngkan da e yumut u leh wa ye u pynman yaw ha ki thaw kiwa kyllooid kam haki madan bol yow lait nei khynnia yow ye u yajngai uwi na uwi kamwa da phah ka sorkar wym chah hi leh u wan yaw ki bru kiwa najngai lane na kiwi tawan ki thaw.
Da ong leh wa ini daw pynsuk ko yaki warep wow pynpoi yaki mar rep yong ki wow dai ha kini ki yaw, heijooh i por yarap haroh ko yaki paidbah wow lait ki u ya ku cha sor kam cha Jowai cha Khliehriat, wei man hi ko leh kawi naki laad wow yada na kani ka kjut khlam dei wym yachem de waki bru kiwa nabaar.
Discussion about this post