Shillong: U Montri Rangbah ka jylla, u Conrad K Sangma da ong u wa ka jylla toh u man ko kawa da pynkhreh ha ini i por wa kiwa chong chnong kiwa sahkut cha kiwi ki jylla da sdang ki wow liwan, wei ka chnat i chait i khiah wa ki bor pynlai District toh u man ki kiwa paitbniah, deiwa pynrap wa ha ka imlang sahlang leh hap wow man kiwa da pynkhreh neibhah ym tip iyi wow jia.
Da ong u wa hanla ka jylla ym em de ko kiwa chah ktah ha u COVID-19, tangwa ym pu toh i por wow chong klikti noh deiwa sñiaw wa kani ka khlam da kut ko, khamtam kattæ wa i wan yong kiwa na baar jylla da sdang poi ki wei ye u mih iwon iwon i jia.
Katkam i ong u Conrad, ka sorkar da chimkhia bha ko wei katni wa liwan kiwa chong chnong, emkaam wow man kiwa syndong bha yei long i man ha kam ini i por, deiwa leh yaki (Test) khak khak wei boonsien neibhah wa du deiwa leh ya ki Test u ye u kdooh u khoom na i maa yong ka khlam COVID-19 ha ka jylla.
U Conrad da klam che u leh wa ym toh u sñiawphær næ kiwa lyngngoh, toh u man kiwa da pynkhreh lada em iwon iwon i jia.
Ka sorkar jylla da pynkhreh ko wow pynpoi noh ya waroh kiwa chong chnong kiwa kwah wow liwan cha ka jylla, kiwa kynthup leh na Delhi, Maharashtra wa West Bengal, wei ya ini ka sorkar dang yaklam ko wa kitu ki jylla wa em kiwa chong chnong ka Meghalaya.
U Conrad K Sangma da ong u wa ka sorkar ka da pynkhreh ko wow pynpoi yung noh ya waroh kiwa chong chnong, khamtam na kitu kiwa na ki thaw wa rap chah ktah, da pyntip u wa kitu kiwa liwan na Bangalore da em ki ha luti wei ha kini ki kajiak sngi daw wanpoi noh leh kiwa sahkut ha Gurgaon, Haryana katwa ya kiwa em cha Maharashtra ka sorkar da pynbait u leh noh smat.
Da ong u wa neibynta kitu kiwa chong chnong kiwa em cha kiwi won ki jylla, ka sorkar ka dang yaleh ko wow thooh ya kiwa kwah u liwan, khnang yow ye u pynbait ya ka rel ka wow wanrah ki heijooh i por na ki thaw wa marjan.
Hawa yatoh wa i booh yaki Quarantine Center haki thaw puræ neibynta kitu kiwa liwan, u Montri Rangbah da ong u wa ka sorkar daw bichaar wei daw e yaka rai, tangwa kamwa man hi kattæ da ekti ha i stad ki Deputy Commissioner kiwa ya krehlang wa ki bor chnong, wei lada emkaam ka sorkar daw chim ko leh ya kiwi ki luti.
Da pyntip u leh wa da pynbood cha 14 tylli ki Screening Points yow ye u pdiang yei wan palat 1400 ngut ki nong Meghalaya na Karnataka kamjooh wow pynkhreh ya kitu kiwa wan na kiwi ki jylla. Wei yaki kyndon wa i rukom krehkaam da yaklam yaki ynne ka sngi.
Discussion about this post