U MLA ka UDP na Khliehriat uwa man leh kam u Adviser ha ka chnat Mining, u Kyrmen Shylla da pynsñiaw u wa i chah thngan yong u Marshall Biam toh neidaw wa da kut laad, neibhah da yooluti da slem wow wai noh ya u moyoong.
Hawa e yaroh yeiwa klem da pyrkhat de yei yong samen uwa chah thngan ha Khliehriat, u Kyrmen da ong u wa ini i chah thngan u Marshall toh i chah thngan yong ki paidbah ka East Jaiñtia wa ka jylla hi kiwa kreh ha ki kaam mooyong, neibhah la 12 snem kattu ym yoh kaam yoh jaam heiwa da chah knieh i ja kpoh ki paidbah ka East Jaiñtia wa ka jylla hi nei khang ka NGT yei tih mooyong.
Da ong u wa ki paidbah ka East Jaintia Hills da yaichah ki hadooh 12 snem, wei da kyntu u kattæ wow ya krehlang wa ka Association kiwa kreh mooyong ka East Jaiñtia Hills. Da ong u wa ka Association da khut wei pynlang ko ya ki kot ki sla yow pynbait pynbiang yow booh yeiwa dawa ha ka sorkar.
Chooh chooh ong u wa ka Association daw yang ko chipor ya ka sorkar, tangwa lada ym leh ko yeiwa ye u leh, daw hap wow leh iyi iyi wei heijooh i por pynsñiaw u yei chaniah ha u Montri Rangbah wow booddien u wa ka sorkar India yow pynlait noh yei khang ya u mooyong.
Hawa kyntu ya u Marshall wow sangeh noh yei chah thngan, u MLA na East Jaiñtia Hills da khut da wer u ya oo wow ya krehlang hapoh ka jooh ka chatri, deiwa ong wym boi de wow pynchitom ya idæ neibhah wa ki paidbah da chitom ki ha ki 12 snem wa dadep.
Discussion about this post